الفصل الثاني

تغفو الصغيره بداخل احضان والدتها اشتاقت لها كثيرآ لا تصدق انها راتها مره اخري امامها اما سعاد تفكر في تلك الحياه التي حرمها منها كامل تناولت هاتف كنزي وابتسمت ساخره الطفله الصغيره تتمتلك احدث جهاز وسعره مرتفع لمحت في يديها خاتم من الذهب وسلسله علي عنقها وبها حرف K
وكمان جابولك دهب اخص عليك يا ايهاب بقي عايز تحرم امك من العز ده كله وتاخده لوحدك انت واخواتك
قالتها بضيق ثم اقتربت برفق من انامل الصغيره وسحبت منها الخاتم ثم قامت بنزع السلسله من علي عنقها دون ان تشعر الصغيره
نهضت من مكانها ثم وضعت السلسه والخاتم بداخل حقيبه يديها الموجوده بالخزينه

______________________

تقلب ايهاب في الفراش يحاول النوم ولكن لا فائده نظر الي رامي المستغرق في النوم ليته يستطيع ان ينعم بنوم عميق مثله، منذ ان عمل مع اعمامه واصبح النوم بنسباله مشكله كبيره عقله لا يتركه لحظه واحده
نهض من الفراش ثم تناول ثيابه وغادر الغرفه لا يوجد اي طريقه للنوم سؤي تناول الخمر الذي اصبح بنسبه له الحل السحري حتي يتمكن من النوم

اتجه الي البار الموجود بالفندق ثم جلس وطلب من النادل الخمر وطبق التسالي

مر الوقت عليه دون ان يشعر نهض بصعوبه من مكانه وهو يحاول ان يسند طوله ظل يتحرك الي ان وصل الي الغرفه دلف اليها ثم القي بجسده علي الفراش نظر الي سقف الغرفه وقال بهمس
مش هرحمكم
اشار بانامله الي الامام واغمض عيينه اليمنه ثم ظل يحرك انامله وكانه يحمل مسدس في يديه واصدر صوت اطلاق الرصاص هاتفآ
هقتلكم كلكم واحد واحد مش هسيب حد
ردد الجمله هذه اكثر من مره الي ان راح في النوم دون ان يشعر

______________
وفي اليوم التالي

هتفت كنزي وهي تبحث عن السلسله التي كانت في عنقها والخاتم
ماما انا مش لاقيه السلسله والخاتم الي طنط سعاد جابتهملي

شهقت هناء بخضه وقالت
ازاي يا كنزي تضيعي حاجات غاليه زي كده

حركت راسها سريعآ
لا يا ماما مضيعتهمش والله كنت لابسهم امبارح قبل ما انام

تنهدت هناء باسف وحزن وهي تبحث عنها علي الفراش
مش موجودين يا كنزي شكلهم وقعوا منك يالهوي لو الي اسمها سعاد دي عرفت اكيد هتضربك

اجابته كنزي
لا دي طيبه اوي وبتحبني

التفت اليها هناء وقالت
بس عند فلوسها مش هتكون طيبه يا كنزي بصي علشان منعملش مشكله معاها هي لو سالتك علي الدهب قوليلها انك قلعتيهم علشان عملولك حساسيه وهي كام يوم وهتنسي

حاضر يا ماما هعمل كده

______________________

استيقظ رامي من نومه ليجد ايهاب علي الفراش ويرتدي قميص اسود وبنطال جينز والحذاء في قدميه

اقترب منه وقام بهزه برفق ويتسائل اين ذهب في الليل هتف ايهاب بملل وصوت ناعس
ملكش دعوه بيا وسيبني انام يا رامي
وعندما نطق ايهاب كلمته تلك استطاع رامي فهم اين ذهب اخيه في الليل فالرائحه التي خرجت من فم ايهاب شرحت كل شئ ايهاب ذهب في الليل لشرب الخمر
تناول رامي الغطاء ثم قام بوضعه علي جسد ايهاب وهو يحرك راسه بعدم رضا اطلاقآ

________________

اجتمعت العائلة باكملها لتناول الافطار كالعاده وكنزي تلتصق بوالدتها وسعاد تراقبهم بضيق حتي لما تتناول طعامها ظلت تبعث في الاناء وعقلها شارد هتف طارق عندما مدت كنزي يديها وتناولت قطعه الخبز من امامه
ايه ده فين الخاتم الي سعاد جابتهولك والسلسله كمان مش علي رقبتك ليه

انتبه جميع الجالسين علي المائده الي كنزي لتجيبه هي
قلعتهم علشان بيعملوا حساسيه ليا

وهي الحساسيه مظهرتش غير اول ما مامتك جات حاجه غريبه بجد
قالها طارق وهو يبتسم بسخريه وينظر الي هناء بذات مغزي لتقول هي بانفعال
قصدك ايه؟ اني سرقتهم يعني ولا ايه

تصنع الدهشه وقال
مين الي جاب سيره السرقه بس يا جماعه انا قولت حاجه زي كده؟

ايوه شوف نظرات ليا عامله ازاي كلها اتهام
قالتها هناء بعصبيه وهي تنهض من مكانها ليقول جلال
اقعدي يا هناء كملي فطارك وانت يا طارق بلاش استظراف علي اول الصبح

اخوك بيتهمني اني سرقت بنتي يا استاذ جلال
هتفت بها هناء في حزن ثم رحلت من امامه ضحك طارق وهو يقول
برافو ممثله فظيعه يا خبر ابيض دي من اول يوم طمعت في السلسه والخاتم بتوع البت امال بعد كده هتعمل ايه

ماما مش حراميه السلسه والخاتم ضاعوا مني صحيت الصبح ملقتهمش وماما قالتلي مقولش لحد علشان طنط سعاد ممكن لما تعرف تزعل ولو حد سالني اقوله قلعتهم علشان الحساسيه
هتفت بها كنزي بغضب طفولي
وليتها لم تنطق الصغيره كلماتها تلك التي اكدت ان والدتها هي من قامت بسرقتهم ركضت الصغيره من امامه حتي تلحق بوالدتها خافت ان تغادر وتتركهت مره اخري بسبب كلمات طارق

ايه يا جلال محدش سامع صوتك ليه؟
قالها طارق الي اخيه بشماته واضحه ليجيبه جلال
بكره هناء عينها تتملي ومتمدش ايدها علي حاجه مش بتاعتها

بس بردو كده خطر علينا دي ممكن تدخل تسرق اي حاجه من الدهب بتاعي انا وسعاد والبنات او فلوس من الخزنه الي في مكتب
قالتها رضوي زوجه عادل ليقول جلال
حرصوا منها اليومين دول لحد ما انا اتصرف

شوفي جوزك يا سعاد شكل عينه زايغه علي هناء ده ضحي بـ ايهاب وناوي يضحي اهو بكل حاجه في البيت علشان خاطرها
قالها طارق وهو يضحك بقوه نغزه عادل في قدميه حتي يصمت ليقول جلال ببردو وعلي شفيته ابتسامه سخيفه
سعاد عارفه كويس اني بحبها ولا يمكن ابص لـ اي واحده غيرها مش كده يا حبيبتي؟
انهي جملته الاخيره وهو ينظر الي سعاد حركت راسها بنعم وابتسمت وهي تتشبت في يديه
_________________

الساعه الثالثه عصرآ ومازال ايهاب يغفو في النوم خرج رامي لتناول الافطار وذهب الي المسبح وتنقل في الفندق وعاد وجد ايهاب كما تركه زفر يضيق ثم قام بايقاظه وهو يقول
لا ما هو انا زهقت قوم اصحي اقعد معايا الساعه تلاته يا ايهاب كفايه نوم

تقلب ايهاب في الفراش وقال بضجر
شويه يا رامي وهقوم

لا مفيش شويه تاني قوم يا ايهاب انا مش فاهم ايه الفكره تقضي الليل كله شرب وترجع ميت كده

تنهد ايهاب بضيق ثم اعتدل من الفراش قائلا بنفاذ صبر
اديني اتنيلت صحيت عايز مني ايه

تقعد معايا تتكلم بدل ما انا هطق من الزهق كده قوم اغسل وشك وفوق كده وتعال ننزل حمام السباحه الميه هنا جميله ومختلفه عن بتاعه الفيلا

بعدين يا رامي انا مليش خلق دلوقتي ومصدع
قالها وهو يتناول الهاتف الموجود بالغرفه ثم قام بالاتصال بخدمات الفندق وطلب منهم ان يحضروا الفطور وكوب من القهوه وبجانبه زجاجه خمر

وعندما انتهي هتف رامي بضيق
هتشرب بيره علي اول الصبح؟ في ايه يا ايهاب دي بجد بقيت حاجه صعبه

حبيبي انا اكبر بـ9 سنين اكيد يعني مش هتيجي انت الي عيل عندك 14 سنه تحاسبني
هتف بها ايهاب وهو يضغط علي شفتيه بضيق ليقول رامي
لما الكبير يعمل حاجه غلط عادي الصغير يحاسبه انت بتشرب خمره ودي حرام وربنا ميقبلش منك صلاه لمده اربعين يوم انا درستها في الدين

اغمض ايهاب عينيه وهو يتنهد بقوه وهتف بجديه
ملكش عوه يا حبيبي ربنا هيعاقبني انا مش هيعاقبك انت وكلمه زياده في الموضوع ده يا رامي هزعلك مني

خلاص تمام وانا كمان هشرب خمره عايز ادق طعمها واشوفها

زعق ايهاب به بعصبيه وهو يعتدل في جلسته علي الفراش
لا كفايه واحد من عيال كامل ضاع مش هنبقي كلنا يا رامي حرام عليك بابا ميستاهلش كده مننا اقسم بالله لو فكرت تقرب منها يا رامي هحرمك من كل العز الي انت فيه ده ومحدش من عمامك هيقدر يمنعني

تسائل رامي باستغراب عن ما الذي يفعله ليجيبه ايهاب بقسوه
هرميك في الشارع وشوف بقي هتقعد فين البيت القديم استلمه صاحبه وخالك مستحيل يستقبلك في بيته

هو انت ازاي اتحولت كده يا ايهاب؟
قالها رامي وهو لا يصدق ما يراه امامه كيف يمكن ان يتحول اخيه الي هذه البشاعه

انتبه ايهاب الي صوت طرقات الباب هتف وهو يشير ناحيه الباب
قوم افتح دول اكيد روم سيرفس جايبين الفطار

استجاب رامي لطلبه تناول الافطار ثم وضعه امام اخيه وقال
انا هروح اتمشي شويه
ولم يمهل ايهاب فرصه للرد وغادر علي الفور

___________________

وقف جلال امام غرفه هناء ثم طرق الباب بخفه وعندما سمحت له بدخول ادار مقبض الباب ثم دلف ليجدها جالسه علي الاريكه تبعث بهاتف ابنتها
وكنزي بحانبها تجلس

تركت هناء الهاتف وقالت بحزن وهي تنظر الي الارضيه
في حاجه تاني اتسرقت وعايزين تتهموني فيها

روحي يا كنزي العبي مع ايتن وسالي بيسالوا عليكي في الجنينه
قالها جلال وهو ينظر الي كنزي وبالفعل ركضت الصغيره وخرجت من الغرفه ليقول جلال وهو يجلس علي الفراش امام الصوفه التي تجلس عليها هناء وقال
انتي حامل في كام شهر؟

استغربت سؤاله هذا وقالت
التالت ليه؟

ابتسم وهو يقول بسعاده واضحه
جميل جدا

حركت راسها باستغراب وهي لا تفهم ما الذي يقصده جلال ليقول جلال
الجنين الي في بطنك ده لازم ينزل

وضعت يديها علي باطنها وهتفت بانفعال
نعم؟ هو ايه الي لازم ينزل انت عايزني اقتل حته مني!!؟

بصي يا هناء انا خدت ولاد اخويا التلاته عندي في البيت وربيتهم لانهم في الاول والاخر من دمي لكن الي في بطنك ده مش دمي

نهضت من مكانها وقالت
وانا اسفه يا استاذ جلال مش هقتل حته مني وعلي العموم شكرا علي ضيافتك ليا امبارح ودلوقتي هلم هدومي وامشي

تنهد بعدم رضا وحرك راسه باسف ثم اشار اليها بالجلوس وقال
ممكن الاول تسمعيني لاخر؟

اسمـع ايـه اكتر من كده انت عايزني اقتل حته مني يرضي مين ده يارب اقتل روح ملهاش ذنب علشان القي مكان اقعد فيه
قالتها بحزن ثم اخفت وجهها بين يديها وانفجرت في البكاء المزيف وهي تآمل بداخلها ان يصدقها جلال

انا عايز اتجوزك يا هناء بس عايزك لوحدك بطولك من غير العيل الي في بطنك ومن غير ولاد اخويا كامل الله يرحمه عايزك انتي وبس

توقفت عن البكاء وهي لا تصدق ما سمعته هل حقآ قال انه يريد ان يتزوجها؟!!

رفعت راسها اليه وقالت بعدم تصديق
انت قولت ايه؟

كرر جلال عبارته مره اخري بهدوء
عايز اتجوزك يا هناء

ومــراتك وايهاب؟!
قالتها بتوتر ولهفه واضحه لجيبها جلال
جوازنا هيبقي في السر محدش هيعرف عنه اي حاجه بس هيبقي شرعي عند مآذون ده احسن حل علشان ميحصلش مشاكل هجبلك فيلا باسمك تقعدي فيها وهبقي موجود عندك من الصبح لحد اخر اليوم يعني انتي بس هتنامي لوحدك لكن باقي اليوم انا هكون معاكي

ابتسمت ساخره وهي تستمع الي كلمات جلال وهتفت
وكده يبقي اسمه جواز؟

علي اقل يا هناء جوازه احسن من جوازتك الاولي بتاعه كامل وجوازتك التانيه من واحد في دور عيالك انتي هتعيشي في عز وخدم وهتلبسي الألماس واللبس من بلاد وياستي متخافيش جوازنا مش هيفضل في السر طول العمر لو خلفتي ولد من صلبي هكشف جوازنا واعرف للكل وهتيجي انتي وابني تعيشوا في القصر هنا وتبقي انتي صاحبت القصر ده كله فكري في عرضي كويس يا هناء وردي عليا معاكي وقت لحد النهارده بليل هستناكي في الجنينه الساعه اتنين بليل يااما تيجي بشنطه هدومك ونمشي من هنا ونطلع علي الفيلا يااما متجيش ووقتها هفهم انك رفضتي عرضي
___________________
وفي صباح اليوم التالي
تقف هناء في الشرفه وتفكر في عرض جلال المغري احلامها باكملها سوف تتحقق في غمضه عين، تفحصت المكان حولها بعينيها اذا انجبت الطفل الذي يريده جلال سوف تصبح هي صاحبت هذا القصر ابتسمت وهي تتخيل نفسها ترتدي الثياب والمجوهرات الباهظه وتهبط الدرج وتعطي الأوامر للخدم

______________

انتهي ايهاب من تناول طعامه ثم جذب هاتفه ونظر اليه اكثر من مكالمه من جلال كان متاكدآ تمامآ انه سيتصل به لذلك قام بتشغيل وضع الصامت في هاتفه بالآمس
تجاهل مكالمات جلال ثم ظل يتصفح الشبكات الاجتماعيه، اشعل سيجاره ثم وضعها في فمه مر الوقت حتي اصبحت الساعه السابعه مساء ورامي لم ياتي قام بالاتصال به ليظهر صوت رنين هاتف اخيه بالغرفه
ومن الواضح ان رامي ترك هاتفه بالغرفه

نهض من مكانه وهو يلعن رامي بداخله فهو عقله لا يتحمل دلال اخيه الصغير هذا
اخرج من الخزينه قميص قطني ابيض اللون باكمام طويله وبنطال جينز اسود
ارتدي الثياب ثم جلس علي الفراش وتناول الحذاء وبدا في وضعه في قدميه وعقد رابطه الحذاء انتبه الي صوت فتح الباب وقدوم رامي
لم يرفع عينيه اليه وظل يكمل ما يفعله وقال بجديه
لسه بدري يا باشا

تجاهل رامي كلماته تلك وقال بجديه
عمي جلال لسه متصلش بيك انا زهقت من قعدتي هنا وعايز ارجع الفيلا

لا اتصل طبعا بس انا مش هرد عليه غير لما اعرف انه طردها من الفيلا
هتف بها ايهاب وهو ينهض من مكانه ليقول رامي
ما يمكن بيرن عليك علشان يعرفك انه طردها وعايزك ترجع الفيلا

اجابه ايهاب ببساطه وهو يرفع اكمام قميصه الابيض
لو طردها كان هيبعت رساله ويبلغني علشان ارد عليه متشغلش بالك بالموضوع ده يلا انا رايح دلوقتي مشوار متتحركش من الفندق غير والموبيل معاك علشان اعرف اوصلك

تفحص رامي هيئه اخيه بسخريه واضحه ثم اردف
لا انا مش هتحرك من الفندق النهارده ولا حتي من الاوضه متقلقش عليا وخليك في البيره الي رايح تشربها لحد وش الصبح

ضغط ايهاب علي شفتيه بضيق ثم تناول هاتفه وغادر من الغرفه وصفع الباب خلفه بقوه اما رامي القي بجسده علي الفراش وحال اخيه الاكبر لا يعجبه..

_________________