البارت 4

البارت( 4 )
أنا حرة
حبيبة عبدالله
.........................................
..................................
لوليتا

فات ييجي اسبوع وانا بجهز شنطتي للسفر
كمان الدكتور زياد طلب مني اتصور عشان البسبور و حاجات تانيه كتير

وطبعا كل الدربكة دي مكانتش شغلاني خالص عن المشاكل
ده انا كنت كل يوم اعمل مشكلة شكل و لو ما اتخانقتش ادور علي اي حد بيتخانق و اتخانق معاه
كل يوم كان بيحصل مشاكل اكتر من اليوم الي قبله
مره اتخانق مع عمي و ابهدله في الشارع وافرج الناس عليه و مره تانيه اتخانق مع مراته و اجرجرها من البيت للشارع وبرده الم الناس علينا ومره اتخانق مع شاب و اخلي عيلته كلها تيجي تتخانق مع ابويه وتحصل مشاكل

يعني مكونتش سكته كنت فرده سطوتي في كل وقت وكل مكان

وعلي الجانب الاخر كنت حسه انهم بيدعو ان الاسبوع التاني يخلص عشان اسافر واسبلهم البيت

كنت مضايقة في الاول بس كنت مبسوطة ومتسلية جداا بحالة الضيق الي كنت عملهلهم

لغايت ان خليت محدش يكلمني خالص و ابقي عامله فريق لوحدي

المهم فات الاسبوع التاني
وخلاص كان فاضل بس سواد اليل و علي 7 الصبح هسافر ب الطيارة

اخدت دش سخن و نشفت شعري و كويته ب المكوه الي اخدتها اتاوه من بنت خالي و دخلت اوضتي نمت علي السرير وانا بفكر في حاجه اعملها بعد ما اسافر اول حاجه فكرت فيها اني اقلع الحجاب و امشي بشعري
ثانيا اخرج و ارجع بعد نص اليل من غير ما حد يكلمني
و اسهر في دسكو
و كل حاجه غلط لسه مجربتهاش هجربها
صحيح انا مش عارفه انطق اسم البلد الي هروحها بس عادي متفرقش

.......................................................
لوليتا

كنت في مكان غريب جداا شبه الجبل الي نازل منه شلال مايه عذبه
كنت لبسه لبس فستان اصفر فاقع و حوليه فراشات صفرة
االمنظر كا تحفة جدا

بس اول ما لفيت وشي و شوفت بركة الوحل الي غرقانه فيها واحده شبهي وكل هدومها مليانة طينة و بتصرخ

قومت من النوم مفزوعة

بصيت في الساعه لقتها 6 ونص
يااااه انا نمت ونسيت اني احضر حاجتي

قومت بسرعة حضرت باقي شنططي

وخرجت عشان اتفاجئ ان ابويه قاعد في الصاله و لابس جلبيه بيضه و حالق دقنه وشكله كانه عريس بلظبط

لكن مستغربتش غير لمه لقيته بيبتسم في وشي و الابتسامه من الودان للودان

تجاهلت الموضوع المريب و دخلت جوه عند امي لقتها مش موجوده في اوضتها

خرجت و لاول مره اسأل فيها ابويه وافتح معاه كلم وقولتله

:هي امي فين

رد عليه بنفس الابتسامة

:راحت السوق.

بصيت في الساعة وقولتله بدهشه

:دلوقتي دي الساعة 6 ونص

رد عليه و برده الابتسامه السمجة لسه موجوده

:انا الي صحتها بدري عشان تجيب لحمة من عند الجزار و تلحق تسويها

رديت عليه بستغراب

:لحمه لي

ضحك وهو بيقول بسماجة مبالغ فيها

:اصل انا قررت اوزع لحمة للغلابة بمناسبت ان الهم انزاح من علي صدري

انتي مش شايفة ان الهم اتشال ولا اي

اضايقت جداا من تلميحاته و الي ضايقني اكتر لمه سالته عن منال

طب فين منال

رد

:ما انا بعت منال تجبلنا شربات هي كمان

ميلت علي الشنطة و اخدتها و لسه هخرج من الباب بضيق لقيته بيقولي

:ما تستني عشان تشربي شوية شربات بمناسبة زوال الغم والهم عن البيت

اتعصبت اكتر و خرجت من الباب وهبدته ورايه
ده حتى مقاليش تعالي اوصلك لا وهيحتفل اني مشيه كمان
طااايب و الله لوله اني عايزه اسافر كان زماني رجعت في كلامي و ضايقتك اكتر يا اسطى سعيد بس صبرك عليه

المهم رنيت علي امي و اختي و كلمتهم وقولتلهم اني مشيت و مردتش ابين عتابي ليهم انهم حتى مودعونيش
بس انا كنت عارفة مين الي غصب عليهم ينزله وهو ابويه عشان يضايقني ويعرفني انه هيرتاح لمه امشي وان مفيش حد حاببني في البيت

المهم روحت العيادة و استنيت د. زياد لحد ما شرف بسلمته
و السواق اخد الشنط مني وحطها في العربية

ركبنا العربية واتوجهنا للمطار

و بعد شوية اجراءات الحمد الله ركبنا الطيارة

كنت متشوقة جداا للرحلة اينعم اتخانقت مع المضيفة فوق الخمس مرات بس كنت مبسوطة

ونمت كتير جداا و افتكرت اني كنت نادرة اني اول ما اركب الطيارة اقلع الحجاب بس اكتشفت ان خلاص وصلنا

ف قولت اول ما انزل اول حاجه اعملها اقلع الطرحه وفعلا قلعت الحجاب في المطار و سيبت شعري وكنت مبسوطة

المهم اول ما رجع د. زياد من الريسبشن بصلي بستغراب وقال

:اي ده

رديت عليه و انا بلعب في خُصل شعري

:قلعت الطرحة اصل انا ندراها اول ما اركب الطيارة اقلعها ومش هلبسها تاني

لقيته بصلي وجز علي سنانة و اخد الشنطه ومشي وسبني من غير ولا كلمة

مشيت وراه و احنا بنركب العربية جه في دماغي سؤال ف قولتله

:ألا بصحيح اُمال فين خلتك دي

رد عليه وهو بيتصفح الاب توب

:معرفش

رديت عليه بستغراب

:نعم ازاي متعرفش

لقيته لف وشه وقالي بسرعه

:اقصد هناك في الڤيلة لمه نروح هنلاقيها

ابتسمت وقولت في سري

:يحلاوه يا ولاد وكمان ڤيلة ده الظهر لعب معاكي علي الاخر يا بت يا لوليتا

المهم وصلنا للڤيلة بعد ساعة تقريبا

و نزلت مشيت جنب د. زياد

ولاحظت وانا بتمشى فيها ان اسورها عليه جداا وعليها حراسه مشدده. كائن وزير الوزرا عايش فيها
ولكن كانت فريدة من نوعها الونها كلها فاتحة ووردها كله بامبي

واحنا دخلين الڤيلة لمحت الجنينة الي كان فيها مرجيحة لونها بنبي وشكلها حلو

خبط د. زياد علي باب الڤيلة
و فتحتله بنت شقرا و جميله جداا و ابتسمت وقالتله بلغة غير مفهومة حاجه وهو رد عليها ببتسامة

المهم انه دخل وانا دخلت وراه و قعدت اتفرج علي اللوح الغريبة و العبيطة في نفس الوقت
دي حاجات انا مش قدره افهمها بس مقدرش اقول غير ان المكان مُميز

ولان رجلي وجسمي وجعوني من السفر الطويل ده ف قعدت ادور بعيني علي اول كرسي يقابلني

وقعدت

ف لقيت د. زياد ساب الشنطة علي جنب و قالي وهو حاطط ايده جوه جيبة

:اطلعي ريحي في اوضتك تاليا هتورهالك

هزيت راسي في تفهم و طلعت مع تاليا الخدامة

بقي الخدامه اسمها تاليا وانا اسمي لُطفيه اقدار

المهم طلعتني اوضه فوق. و سابتني ومشيت من غير ولا كلمه و بعد ثواني لقتها بتخبط تاني و بتديني شنطت الهدوم بتعتي

اخدتها وقفلت الباب

و طلعت منها بجامة قطنية مريحة و دخلت الحمام الي جوه الاوضه و اخدت دش سخن

وخرجت نمت علي السرير

..............................................................
لوليتا

فتحت عينيه بفزع علي صوت زمارة قوية جداا وصادح في كل مكان بصيت علي الساعة لقتها 6 صباحا
اي ده مين ابن المزعجه الي بيزمر الساعه 6 ده انا هطلع ميتين امه

طبعا في اللحظة دي نسيت اني في ڤيلة وكده وبتعامل كائني في شارعنا

المهم لبست الشبشب الي جنب السرير وخرجت بره الاوضه و قفلت الباب ف الصوت اختفة
المهم اني كملت نزولي علي السلم عشان اتفاجئ ب د. زياد قاعد علي سُفره طويلة عريضة وفيها اكل

و بياكل و بيبص عليه بطرف عينيه وبيكمل اكل تاني

نزلت علي السلم وانا بصه عليه وقولتله

اي ده انت لسه هنا

رد عليه من غير ما يبصلي

:كنتي فكراني هروح فين يعني

وصلت عنده و شديت الكرسي ولسه هقعد لقيته ساب الاكل و قالي وهو باصص في عينيه اوي

:قومي اغسلي ايديكي

رديت عليه وانا بنتش صباع فينه وبستفزه

:لي

قام وقف و شدني من ايدي الي فيها الفينه و ضغط عليها جامد لحد ما لونها ازرق وقالي وهو عينه مرمشتش

:لمه اقول كلمه تتنفز من غير نقاش

شد الفينه من ايديه وجرجرني لحد الحمام

وكل ده وسط زهولي

فتح الحنفيه و نزل ايدي تحتيها و هنا رجعت لوعيي وقولتله وانا بشد ايدي

:اي الي انت بتعمله ده هي هربت منك ولا اي ده انا ا

ولسه هكمل لقيته كتم بقي وقالي

عارفه لو سمعتك بتقولي الكلام ده تاني هعمل فيكي اي

شديت نفسي من تحته و طلعت اجري بره الحمام اول حاجه فكرت فيها هي المطبخ

قولت اجيب سكينه من المطبخ و اهوشه بيها او اي آله حاده بس الي اتفاجئت بيه ان المطبخ مفهوش ولا اي آله حاده

لسه هخرج منه لقيته في وشي

زعقت فيه وقولتله

:انت عايز مني اي
وبعدبن فين خلتك دي التعبانه الي هقعد معاها

رد عليه بهدوء

:انا مليش خالات

رديت عليه ببرنق عيني

:اااااه قول كده بقي اتاريك عمال تبصلي نظرات غريبه قول هتبيع اعضائي ولا هتغتصبني قول قول وتعاله معايه سكه ودغري

رد عليه بهدوء.

:خلصتي فقرتك

اولا انا مش هبيع اعضائك ولا هغتصبك عشان انا لمه اجي ابيع اعضاء هختار حد فيه اعضاء مش انتي و لمه اجي اغتصب هستنضف واختار حاجه تستاهل

بصتله بضيق ف لقيته بيكمل ويقول

:انا مجبتكيش هنا عشان شغل ولا عشان تخلي بالك من حد انا جبتك هنا عشان عايز اعلجك

رديت عليه بحده

:تعالجني من اي قالولك عني عندي تبول لا ارادي ولا بشد في شعري

رد عليه بثبات

:لو فضلتي تتكلمي ب الطريقه دي ف انتي هتخلي شهرين السجن عذاب بنسبالك

رديت عليه بندهاش

:سجن

:ايوه سجن المكان ده مش بيت عادي ده سجن انا جهزته عشان يكوون سجنك لو مسمعتيش الكلام هتتعذبي اكتر و شهور سجنك هتكتر

رديت عليه ببتسامة مستفزة

:أعلي مافخيلك اركبه انا هخرج ولا انت ولا عشره من عينتك يقدره يمنعوني

ولسه هخرج من الباب لقيت اتنين شحوطه وقفين قدام الباب اول ما خرجت شدني واحد منهم من.البيجامة و شالني و التاني سعده علي كده قعدت اصرخ يمكن حد يسمعني بس محدش سمعني بصيت بجنب عيني لقيت زياد حاطت ايده في وسطة وقالهم كلمتين ب الاجنبي
تقريبا قالهم طلعوها فوق لان طلعو بيه علي فوق و اول ما دخلوني الاوضه هبده الباب ورايه

طبعا انا اتغظت وقومت ادور علي مكان افتح بيه الباب بس معرفتش

حتى مفيش اي مكان اقدر اهرب منه و مفيش غير بلكونه محطوت عليها شباك حديد

قعدت طول الوقت اكسر وارزع في اي حاجه تقابلني بس مفيش فيده انا محبوسة محبوسة لا محالة

واخر ما خلاص مقدرتش استحمل قعدت علي الارض و قرفصت
وحطيت ايدي بين وشي و بعد دقايق لقيت الباب خبط خبططين لسه هروح عنده لقيت ورقة بتتحدف من تحت عقب الباب بصيت علي الورقة و اخدتها وقعدت علي الكرسي وفتحتها

(لو حبه تخرجي من الاوضه يبقي لازم تفهمي ان كل حاجه ليها قوانينها هنا و قواعد
وعشان تبقي الصورة واضحه لازم تعرفي اسسيات. قواعد البيت ده

.1 - 6 الصبح ب الدقيقه تصحي من النوم تخدي شور
و تنزلي تفطري

.2- لازم علي اي وجبه تغسلي ايديكي الاتنين و ممنوع تبهدلي حاجه ومترجعهاش تاني زي ما كانت يعني تنضفي مكانك كويس لان محدش هينضف مكانك

.3- ممنوع اي لفظ خارج او اي كلام بزيء ولا خروج ولا دخول من غير اذن

.4- (..اتمنا ليكي"حُرية" زي ما انا عايز..)

قطعت الورقة وانا متغاظة و قولت في سري

:ااااااه ده انت شكلك بتلعب في عداد عمرك و ليلة ابوك سوده واما اشوف يا انا يا انت ....

يتبع .......

حبيبة عبدلله(مفيدة)