السابع وعشرين

رامي جاله ذهول من كلام داليا ومكانش عارف يقول اي او ينطق بايه، خرج فورا من اوضتها وطلب انها تخرج من المستشفي وتروح عالبيت عنده..

تاتي يوم بدات داليا تتحسن وكانت ليندا قاعده معاها بتاكلها ودخل رامي واول ما شافته داليا ابتسمت..

رامي: اي الاخبار، عامله اي النهارده

داليا: الحمدلله، احسن.. مفيش اخبلر عن فاروق؟

_سلمناه للبوليس وقريب هيتم محاكمته، المهم سيبك، انا بفكر اخد اجازة يومين ونطلع دهب، اي رأيكو؟

ليندا سقفت بحماس: واااو، هو ده الكلام..

بص رامي لداليا فقالت: ان شاءالله تتبسطوا، تروحو وتيجو بالسلامه.

ليندا: تقصدي نتبسط، انتي هتيجي معانا وش طبعاا..

داليا: لا معلش انا مش هينفع اسافر حاليا، لازم اشوف هيحصل اي مع الزفت فاروق..

رامي: نتابع بالتليفون.. وبعدين انا مسافر عشانك اصلا…

داليا وليندا بصوله وهو قال: عشاننا كلنا يعني اقصد، فرصه كلنا نغير جو..

ليندا: بليز يا داليا توافقي، انتي عارفه رامي حتي لو بيغير جو هيشتغل بردو ،يعني مفيش حد هيبقا معايا ولا هعرف اتبسط..

رامي: كلام ليندا صحيح ،عالاقل تعالي ونسيها..

بعد ضغط من رامي و إلحاح من ليندا وافقت داليا انها تروح معاهم دهب وبالفعل اتحركوا في نفس اليوم..

داليا كانت مبهورة بالجمال من حواليها ومش مركزه مع رامي اللي كان سرحان فيها وبيفتكر كلامها في المستشفي..

رامي: قوليلي يا داليا، بحكم انك بنت و ادري مني بأمور البنات يعني.. لو في بنت بحبها وعايز اعترف لها اني بحبها او علي الاقل مشدود ليها اعترفلها ازاي؟

داليا اتاخدت من كلامه ودارت عينيها عنه وقالت: مش شرط تعترف لها بالكلام، الافعال والمواقف دايما بتثبت حبك اكتر..

_اممم.. مواقف زي اي مثلا؟

=يعني زي انك تحتويها مثلا، اي بنت بتحب الاحتواء، بتحب تحس انها مطمنه ومسنوده علي راجل، لو محستش انها مسنوده علي الراجل اللي معاها مش هيبقاله قيمه عندها…

_امممم.. كلام جميل.. و اي كمان. يعني ممكن اعمل اي يخليها تفهم اني بحبها او مهتم بيها .

=ممكن مثلا تفاجئها يهديه صغيره،حاجه هي بتحبها، مش شرط هديه كبيره، ورده او شوكولاته ممكن تكون عندها احسن من مليون حاجه غاليه..

جت ليندا وهما واقفين يتكلمو مع بعض فقالت: اي بتكلمو في اي، ممكن اعرف؟

رامي قال وهو بيغير الموضوع: كنت عايزك يا ليندا، معتز طالب ايدك مني.. اي رايك..

ليندا: بتهزر طبعا!! معتز مين ده اللي اوافق اني اتحوزه ده استحاله طبعا

رامي: طيب علي العموم فكري وخدي وقتك بلاش نتسرع في الرد،وبالنسبه لمعتز هو علي فكره شخص كويس جداا بس محتاج اللي يتعامل معاه يكون فاهمه،وزي مقولتلك فكري وردي عليا بعدين، يلا انا خارج اجيب اكل وراجع..

…

بالليل كانت داليا سهرانه قدام البحر وحست بحد وراها بتلف لقته رامي ومعاه بوكس صغير قدمه ليها وهي خدته وفتحته…

داليا: اي ده؟! اللله.. دي الشوكولاته اللي انا بحبها،عرفت منين اني بحبها؟!

رامي ابتسم وقال: يعني، سينس..

_ميرسي بجد، بس اي المناسبه؟

سكت رامي ومنطقش وفضل يبصلها بتوهان وهي افتكرت كلامه وقلبها دق بسرعه وبصت للبحر تاني..

رامي: بتحبي البحر شكلك كده، بتسرحي معاه كتير..

_امممم.. منا قولتلك قبل كده انه شبهي، يمكن عشان كده بحبه..

=طب وانا؟!

_انت اي؟

=بتحبيني؟!

داليا حست ان قلبها هيقف من الصدمه: نعم؟!

=اي مالك متنحه ليه كده؟! سالتك بتحبيني؟ مش ده كلامك اللي كنتي بتقوليه في المستشفي؟!

_ مستشفى اي لا طبعا، اكيد دي هلاوس بنج..

=هلاوس بنج؟ جايز بردو، عالعموم يلا بينا ندخل لان الجو برد وكده هتتعبي زياده..

دخلت داليا اوضتها ونامت وراح رامي علي اوضته بس كان سرحان في ملامح داليا اللي شغلته وكلامها اللي خلاه محتار ومتلخبط…

….

معتز اتصل علي ليندا وكانت نايمه..

_ايوة يا ابيه معتز..

=يا فتاح يا عليم عالصبح، انا هعمل نفسي مش سامع… انتي لسه نايمه لدلوقتي ليه؟

_عادي، سهرانين طول الليل ولسه ببدا انام، محتاج رامي اخليه يكلمك؟

=بقوللك اي يا ليندا بلاش مراوغه، انتي عارفه اني مش عايز رامي، انا متصل عشانك انتي..

_طيب يا ابيه لما افوق هكلمك..

=لينداا استني متقفليش، مش كل ما اكلمك تتحججي وتقفلي..

_نعم يا ابيه معتز.. عاايز اي

=قولتلك بلاش زفت ابيه معتز دي بتعصبني وبتخلي دمي يفور.. وبعدين انتي عارفه انا عايز اي، هو رامي مكلمكيش في حاجه امبارح؟

_امممم.. كلمني.. وانت عارف رايي في الموضوع ده.. يا ابيه معتز ازاي هتجوزك وانا بقولك يا أبيه..

=خلاص بجلي تقولي يا أبيه.. سهله اهي..

_يا أبيه انا مش قصدي، اقصد ان احنا بينا فرق كذا سنه وبعدين انا بعتبرك اخويا زي رامي..

= اخوكي منين ان شاءالله، امي اسمهاا نظلي وامك اسمها غاليه هنبقا اخوات ازاي ، وبعدين فرق سن اي ده هما عشر سنين عمي يعني مش حوار، متبقيش اوفر بقاا يا لولي..

اتنهدت ليندا بحيره وقالت: سيبك من الكلام ده كله، انا معرفش عنك كل حاجه، او بمعني أدق علاقتنا مش احسن حاجه يعني، لازم الاول نتعرف علي بعض ونشوف هنختلف ولا هنتفق.

وقال معتز بملل: نتعرف علي بعض ايه يا ليندا ده انا ابويا وامي اتعرفوا علي بعض وانا في سته ابتدائي.. انجزي يا ليندا، انجزي العمر بيضيع مني ولسه مكونتش أسره الله يخرب بيتك..

_طيب خلاص، خلاص سيبلي وقت كفايه ا اشوف نفسي و افكر فيه و ادرس ابعاد الموضوع و ارد عليك..

=تدرسي ايه يا ماما هو انا بقوللك هترشح لمجلس الوزرا بتقوليلي هتدرسي الابعاد والحيثيات،بقوللك اي يا ليندا اقفلي، اقفلي انا خلاص صرفت نظر عن ام الجوازة دي…

قفل معتز التليفون وهو في قمة غضبه وعمال يقول: اقسم بالله انا لو متقدم ل مونيكا بيلوتشي كان زماننا اتجوزنا ومعانا عيلين في الاعدادي، يخربيت الحب اللي يذل صاحبه بالطريقه دي يا شيخه..

واثناء ما كان بيكلم نفسه تليفونه رن وكان رامي، رد عليه بعصبيه..

معتز: بص يا رامي اختك دي عايزة تتجوز واحد يصبحها بعلقه ويمسيها بعلقه وهتقولله سمعا وطاعه، انا بكلمك بأمانه يعني، انما عشان شايفه اني مدلوق عليها سايقه دلالها لما طلعت عين امي.. وانما للصبر حدود انا بقوللك اهو، انا مش عشان بحبها هفضل مدلوق عليها الدلقه السودا دي طول العمر يعني

رامي جاوبه بكل هدوء: وانت مدلوق عليها ليه؟!

معتز مردش ورامي قال: اقولك انا مدلوق عليها ليه؟؟

معتز: ليه؟؟؟

رامي: عشانك جردل.. ما طبيعي البنت لما تلاقي الراجل مدلوق عليها تتدلع وترفضه كمان.. العيب منك انت

معتز: معاك حق فعلا.انا بعد كده هديها بالجزمه..

_ما تحترم نفسك يا حيوان هي مين دي اللي تديها بالجزمه، بص فكك من موضوع اختي ده وخلينا اصحاب احسن .

معتز: افكني ازاي يا رامي منتا عارف ان اختك جامده.. قصدي يعني… حلوة، حلوة وشغلت بالي وقلبي من يوم ما شوفتها..

قاطعه رامي وقال بعصبيه: ايه؟! اقفل يا معتز والا قسما بالله اكون عندك حالا ومفرغ مسدسي كله في راسك.. غووور من وشي يلاااا

قفل معاه رامي وهو متعصب ومش شايف قدامه وبيبص بالصدفه علي مدد بصره شاف داليا نازله الميه فضل مركز معاها لدقايق لحد ما لمح مجموعة شباب بيقربوا منها وبيضايقوها، راح جري لعندها وسمع واحد منهم بيقول : صباح الخير يا لذيذ، ممكن نتعرف بليز..

داليا عامت بعيد عنهم وهو فضل ملاحقها ل وبيغلس عليهاا والشباب اللي معاه بيضحكو وبيسيطوه لحد ما رامي مسكه ونزل فيه ضرب والشباب اللي كانو معاه اختفو من خوفهم من رامي وبعدين سابه وبص لداليا بغيظ وقال: انتي واقفه متنحه كده ليه، اتفضلي قدامي.. يلااااا

_اتفضل قدامك فين انا لسه نازله الميه حالا ملحقتس اعوم..

=ان شالله عتك ما عومتي. ابقي انزلي الميه اي وقت تاني يكون هادي ولا انتي عاجبك يعني قلة القيمه دي في وسط الناس

_هي فين الناس دول يا رامي بيه سلامة الشوف.. احنا في حته مقطوعه لا فيها ناس ولا حبوانات حتي..

=داليا من فضلك بلاش تجادليني دلوقتي انا روحي في مناخيري..

_وانا مالي انا رةحك في مناخيرك ولا في ودانك.. بردو مش هخرج..

=بقاا كده… طاااايب

رامي فاجأ داليا لما شالها وخرج من المياا وهي عماله تلطش فيه
وتقوله: نزلني يا رامي، بقولك نزلني، نزلني يا جبان بقولك

رامي وصل الشاليه ونزلها فبصت له بغضب وقالت: انت اي اللي هببته ده، ازاي تشيلني كده قدام الناس..

_,وهي فين الناس دول يا داليا هانم سلامة الشوف ده احنا في حته مقطوعه لا فيها ناس ولا حيوانات حتي..

=اووووففف..دي حاجه تخنق..

جت داليا تخرج مسكها من ايديها وقال: رايحه فين؟

_خارجه عالبحر،هو انا جايه هنا اقعد في الاوضه ولا اي..

=مفيش خروج ولا بحر تاني الا اذا كنت انا معاكي..

_نعم ؟! و ده من اي ان شاءالله.. لا علي فكرة لو متهيالك انك هتتحكم فيا عشان انا هنا قي مكانك انا ممكن ارجع القاهره دلوقتي حالا..

رامي بصلها ومردش عليها وخرج وقفل الباب بالمفتاح وراح يجيب فطار و جوه كانت داليا بتاكل في روحها من الغيظ..

شويه وليندا نزلت شافت داليا عماله رايحه جايه تفرك في ايديها بغيظ فقالت لها: بونچور داليا..

_بونچور يختي..

=مالك متضايقه كده و اوت اوف مود..

_بسبب اخوكي اللي عامل فيها هيرقل ده.. اتكي عالصبر بس لما ييجي، ان ما خليت عيشته سواد مبقاش انا داليا..

=مالك بس يا بيبي عمل لك اي رامي…ده حتي رامي ده سو كيوت..

_بقولك اي يا ليندا انتي كمان، بلا سو كيوت بلا سو يا سو.. الاستاذ الجلنف ده ازاي يدي لنفسه الحق انه يشيلني كده قدام الناس ويجبرني ابطل عوم كمان لا و فوق كل ده حابسني هنا قي الشاليه وخد المفتاح ومشي..

=معقول؟! ليه كل ده؟!

_قال اي عشان شاب اهطل كده ضايقني في الميه، مسكه عجنه وخلاه مينفعش بربع جنيه مخروم بعد كده وفضل يزعق شبه الغراب

ضحكت ليندا وقالت: ده شكل السناره غمزت و كيوبيد أطلق سهامه والحياه بقا لونها بمبي وانا جمبك وانت جمبي عالاخررررر..

_ بقولك ايه يا سندريلا الشاشه ،مش وقتك عالصبح، انفضي دماغك من الكلام الفاضي ده واتفضلي شوفي لنا صرفه عشان اخرج من هنا..

=مش هينفع يا داليا، رامي بياخد معاه المفاتيح وهنا مفيش مفاتيح وبما انك بتقولي قفل بالمفتاح يبقا مفيش قدامنا حل غير اننا نستناه لحد ما يرجع،بقولم ايه تعالي نطلع نقعد في التوضه ونشرب اي حاجه نتسلي فيها لحد ما ييجي يلا بيناا..

…

كان رامي بيتكلم في التليفون وهو بره مع ظابط صاحبه..

_بجد؟! مع ان عشر سنين عليه مش كتير الحيوان ده، علي العموم يا فارس انا عايزك تروقه، اللي زي فاروق ده ملعون و يستاهل اللي يجراله..

=متقلقش يا رامي،فاروق تحت عنيا، قولي انت عملت اي مع تامر الرفاعي والمشكله اللي بينكو؟

_اه بالنسبه للورق يعني؟ الورق بتاعي معايا قي الحفظ والصون..

=معقول؟! ازاي ده؟!

_انت عارف بقا حبيبك رامي و أساليبه الملتويه..

ضحك فارس وقال: طول عمرك نمس وميتخافش عليك..

_اومال اي، ده انا لو حقي في بؤ الاسد اجيبه، يلا هقفل انا عشان مطولش عليك، سلام

قفل رامي ورجع الشاليه ودخل ملقاش حد من البنات، دور عليهم في كل مكان مش موجودين، طلع عند اوضة ليندا ولسه هيخبط سمع داليا بتقول: بس تعرفي يا ليندا, مش هخبي عليكي، اول ما رامي ضرب الولد اللي كان بيعاكسني في الميه حسيت ساعتها اني مسؤؤله منه، خسيت لاول مره من ساعة وفاه بابا وماما يعني ايه امان، يعني ايه تكوني مسنوده علي حد وبتتحامي فيه، تعرفي؟.. انا للحظه حسيت ان رامي بيحبني وغيران عليا، حسيت انه بيدافع عن حاجه تخصه او تهمه مش مجرد انه بيدافع عن اي بنت وخلاص، س قولت اكيد لا متهيالي و انا ولا في دماغه اصلا…

في اللخظه دي رامي قرر ميستناش، فتح الباب عليهم ودخل وهو بيبص لداليا بابتسامه وقال: ومين اللي قاللك انك ولا في دماغي؟

داليا بصت لليندا و ليه وقالت: يعني اي

_يعني انا بحبك يا داليا ، تتجوزيني؟؟