الفصل الرابع

#الاسطى_هانم
#الفصل_الرابع

((اخرة المعروف))

مر اكثر من اسبوع علي ذالك الوعد الذي قطعه لجده وهو يبحث بكل مكان اعطى رقم السيارة التي اعطاها له جده لصديقه لكي يبحث عنها وفي نفس الوقت كان هو يبحث بنفسه ولم يلقي نتيجة حتي كاد ان ييأس ولكن كان يذكر نفسه اولا بوعده لجده ثانيا ان ذالك الشخص الذي يعمل بالمرور لم يرد له خبرا حتي الان جلس علي المقعد ببهو القصر يزفر بتعب بعد رحلة متعبة من البحث كحال كل يوم دلف مازن في ذالك الوقت وجلس بجانبه دون كلمة وبعد قليل من الصمت:

_لسة ملقيتهمش؟!...

زفر تميم بحنق وهو ينظر له ليقول:

_ولا ليهم اي اثر

ثبت نظراته عليه مرة اخرى ليقول بتساؤل:

_هي فين لارا صحيح من وقت ما جيت وانا ماشوفتهاش ولا جت سلمت عليا

ابتسم مازن بتهكم وهو يقول بسخرية:

_الليدي لارا لا لا ملكش حق يا تميم هي فاضيلنا تلقيها دلوقتي مع البرنسيس سالي بيعملوا شوبينج اومال انت فاكر ايه الشوبينج اهم طبعا

عقد تميم حاجبيه بتعجب من نبرة صديقه الساخرة المختلفة تماما عن نبرة الغرام التي كانت تقطر منه حين يتحدث عن لارا ليقول:

_هو في ايه يابني في مشكلة حصلت ولا ايه؟!

هز رأسه بعدم اكتراث وهو يقول:

_سيبك مني مفيش حاجة مهمة المهم تركز دلوقتي انك تلاقي مرات عمك وبنتها وبالمناسبة لازم تاخد بالك اوي من اللي اسمها سالي دي

كاد تميم يستفسر منه اكثر ولكن قاطعه صوت هاتفه ليتبين له صديقه ذالك الذي يساعده برقم سيارة عمه ليرد سريعا ومازن ينظر له باهتمام وما ان استمع للطرف الاخر حتي ارتسمت علي وجهه ابتسامة مشرقة لينهي المكالمة بعدما شكر الرجل كثيرا ليقول سريعا موجها حديثه لمازن وهو يهم بالوقوف:

_حدد مكانهم وبعتلي العنوان انا ريحلهم دلوقتي

وقف مازن سريعا وهو يلحق به ليقول بحماس:

_يا فرج الله استني يا تميم انا جاي معاك

ذهب معه ليركبوا السيارة منطلقين لذالك المكان
******************************
وصلوا اخيرا بعد فترة من تتبع ذالك الموقع الذي ارسله له صديقه لينتهي به المطاف بتلك الحارة الشعبية وذالك المنظر الجديد علي انظاره بالتأكيد صديقه حدد مكان تلك الحارة ولكنه لم يحدد في اي بيت تحديدا ترجلوا من السيارة التي تركها في بداية الشارع ليلتفوا حولها الاطفال يهللون نظر تميم ومازن لبعضهم وهم يكملوا طريقهم زفر تميم بيأس ليهز مازن رأسه بلا بأس وهو يوقف طفل صغير يسأله عن المنزل ليقول له:

_بقولك يا حبيبي تعرف بيت واحد اسمه محمد فايز البدري

نظر له الطفل بوجهه الملطخ وملابسه المذرية ليقول بعدما نظر لهم بتفحص:

_هتديني كام وانا اقولك..

نظر له تميم بزهول ليضحك مازن بارتباك وهو يمسك الطفل من ملابسه ويخرج من جيبه النقود:

_احباب الله..خد يا حبيبي الفلوس اللي انت عايزها فين البيت بقي

اخذ الطفل المال لينظر لها بفرحة ومن ثم انطلق راكضا نظر تميم لمازن بعدم فهم وهو يقول:

_هو ايه اللي حصل ده؟!..

نظر له مازن ليقول ببساطة كي يلهيه عن ذالك الحدث:

_ايه يا تميم انت عارف الاطفال طبعا فرح وراح يجيب حاجات بالفلوس وجاي تاني يقولنا المكان ..ان شاء الله يعني

قالها بيأس وهو ينظر علي الطريق الذي ذهب منه الطفل ليهز تميم رأسه وهو يقول بجدية:

_تمام نستناه بقي..

امسكه مازن من يده وهو يمشي:

_لا نستناه ايه تعالي بس نشوف فين البيت ده الواد ده خلاص كدة علي الله حكايته

نظر له تميم بعدم فهم لما قاله ليقول مازن سريعا:

_يلا يابني انت لسة هتنح

مشوا قليلا بتلك الحارة والتي كانت اسوأ خطوات يخطوها تميم بحياته يعلم كم هو وسيم ولكن لا لدرجة ان يتعرض لمضايقات الفتيات كلما خطي زفر بغضب وهو يتواري قليلا وراء مازن الذي كان يضحك بشدة ليقول تميم بغيظ:

_يا سلام عاجبك اوي اللي بيحصل ده

قال له مازن وهو يحاول كتم ضحكاته بصعوبة:

_اعملك ايه ما انت اللي فاضلك اتنين ڤولت وتنور اشرب بقي يا كبير محدش هنا شاف قبل كدة الشغل العالي ده بقولك احنا نسأل اي حد ليه محل هنا اكيد بيكونوا عارفين

تمتم بغضب وهو ينظر حوله محاولا انهاء تلك المهمة التي زادت عن الحد ليأخذه مازن وهو يتوجه ناحية ذالك الميكانيكي حتي يسأله اقتربوا من ورشة سيد دونجل الذي ما ان رأهم حتي قال بابتسامة بلهاء:

_ما شاء الله.. الله اكبر اؤمر يا باشا سيد دونجل في الخدمة

ظل تميم يتلفت حوله باستغراب اثار حفيظة الواقف امامهم ليقول مازن:

_احنا كنا بنسأل علي بيت واحد اسمه محمد البدري

نظر دونجل لتميم الذي ينظر حوله باستغراب ليقول بابتسامة لزجة:

_طب والاخ مش عايز مصلحة كدة ولا كدة

نظر له تميم بانتباه ليقول بتلقائية بلهجة فرنسية:

_ Vous me parlez "انت بتكلمني انا"

نظر له دونجل بتعجب ليضع مازن يده سريعا علي فم تميم وهو يقول بخفوت:

_ابوس ايدك متتكلمش كدة هيفتكرك بتشتمه وهينفخنا بالمنفاخ اللي قدامه ده

تجاهل دونجل جملته الاخيرة بعدما عجز عن فهمها ليقول:

_لامؤخذة يا باشا مش حاطط ايدي علي البلف تقصد مين اللي بتدور عليه ده

اخرج مازن ورقة من جيبه وهو يقول بعدما وضعها امامه:

_ده رقم التاكسي بتاعه هو كان سواق عليه ومات من فترة

حاول دونجل ان يتذكر شخص كهذا ليقول بحماس كأنه اكتشف سر التحنيط:

_ايوة عرفت تقصد عم محمد الله يرحمه طبعا عارفه يا باشا حد يتوه عن عم محمد

ثم اخفض صوته قليلا ليقول بفضول:

_بس عدم لامؤخذة كنتوا عايزينه في ايه ده الراجل مات

ابتسم مازن بتكلف وهو يقول بحيادية:

_ابدا احنا كنا عايزين مراته وبنته في مصلحة كدة وماشيين علي طول

اومأ دونجل بتفهم لم يشبع فضوله لينادي علي مساعده كي يريهم المنزل:

_ولا يا نخلة روح ودي البهوات لبيت ست البنات وست المنطقة كلها ياض

اومأ نخلة بطاعة وهو يمشي امامهم يقول:

_عنيا يا اسطاا..

تحركوا خلفه حتي وصلوا لذالك المنزل القديم ومن ثم صعدوا للاعلي وما ان دق الصبي الباب حتي استمعوا لصوت انثوي عالي يأتي من الداخل فتح الباب لتطل هي بتلك المنامة الواسعة ذات الروسمات المضحكة وشعرها الاسود الطويل الحريري يغطي وجهها بالكامل لملمت خصلاتها سريعا وهي ممسكة نخلة من تلابيبه تقول بحنق:

_ياض انا مش قولتلك هطلع اريح ساعتين عشان انزل تاني بالليل اكمل شغل طالع تصحيني دلوقتي ليه

نظر تميم لمازن بصدمة وهو بادله تلك النظرة ايضا وما كادت هانم ترفع رأسها حتي شهقت هي الاخرى بصدمة تحولت لرعب وهي تقول بارتعاش:

_يا باشا والله كبرت الموضوع ده هو فانوس وهصلحه مكنش في داعي تتعب نفسك وتيجي لحد هنا

رفع يده بغضب امام وجهها ليوقف سيل كلماتها التي لا تنتهي لترفع هي يدها جانب رأسها بتحية عسكرية ليقول بغضب من كثرة حديثها:

_اسكتي بقي ايه بالعة راديو..

لم تعطيه فرصة ليكمل حديثه جرت من امامهم للاسفل سريعا لحقوا بها بتعجب لما تفعل لتقف في وسط الحارة وهي تقول بأعلي صوتها:

_يا ناس الحقوني دول جايين يتهجموا عليا في بيتي يرضيكوا يا خلق انا عايزة الحكومة تجيبلي حقي

خرج المعلم عطوة من قهوته ما ان استمع صوتها ليقول بصوت جهوري:

_ايه ياض منك ليه مين مزعل نوارة حارتنا

اقتربت هي منه سريعا لتقول بدلال مفتعل وهي تسبل عينيها:

_يرضيك الناس دي تيجي تتهجم عليا في بيتي وانت في حارتنا يا معلم

تحدث تميم بانفعال ما ان خرج من صدمته:

_يا انسة احنا هنتكلم كلمتين مش اكتـ.....

قاطعت كلماته ما ان رأت سيد دونجل قادم علي اثر الجلبة التي احدثتها لتقترب منه ايضا وهي تقول بمسكنة بعيدة كل البعد عنها:

_طب اشهد انت ياسطاا دونجل ولا عشان احنا اتنين ولايا نبقي ملطشة للي رايح واللي جاي

نظر لهم دونجل بغضب وهو يرفع المفتاح الذي يصلح به السيارات ليقول بشر:

_ده انتوا ليلة ابوكوا مش فايتة النهاردة

اقترب منهم ليتجمع حولهم جميع سكان الحارة بما فيهم المعلم عطوة وبدأت المعركة بينما وقفت هانم علي جانب الطريق تنظر اليهم بفخر انتفضت بقوة عندما خرجت ام سلامة من الشرفة جانبها لتقول بعدما تنهدت:

_في ايه يا خالتي قطعتيلي الخلف في حد يخرج فجأة كدة

نظرت للمشاجرة امامها لتقول:

_هو ايه اللي بيحصل يا بت يا هانم

عقدت ذراعيها امام صدرها وهي تقول ببساطة:

_ولا حاجة يا خالتي متشغليش بالك ده جوز بهوات شايفين نفسهم واهل الحارة الله يسترهم بيوجبوا معاهم

مصمصت ام سلامة شفتيها وهي تضع يدها علي وجهها موجهة نظراتها عليهم:

_ياختي الواد اللي بيضرب في النص ده عينيه ملونة وزي فلقة القمر

لم تكمل حديثها لتستمع لصوت تميم وهو يصرخ بتألم لتقول هانم بفرحة وهي تنظر لها:

_شكرا والله يا خالتي نردهالك في الافراح
******************************
وقفوا جميعا امام ضابط الشرطة كلا من هانم والمعلم عطوة ودونجل بينما يجلس تميم ومازن ووجههم عليه ضمادات ويتأوهون بألم لينظر لهم الضابط وعيناه لا تحيد عن وجه هانم باعجاب من هيأتها التي اتت بها ولم تبدلها نفض عن رأسه تلك الافكار وهو يتنحنح ليقول:

_ممكن اعرف ايه اللي عملتوه في تميم باشا ده انتوا مش عارفين هو مين

ضربت هانم كفيها ببعضهم وهي تقول باستنكار:

_يا باشا وهو يعني عشان بيه كبير وليه مركزه يعمل ما بداله ولا حد يقدر يفتح بوقه لا بقي انا عايزة حقي يا حكومة ولا هو يعني علي رأي المثل اللي ضهر ما يضربش علي بطنه

ضرب الضابط يده علي المكتب ليقول بغضب:

_ضهر ايه وبطن ايه يا روح امك ده انتوا مخرشيمينهم واخر كلام اللي يقول عليه تميم بيه هو اللي هيمشي

نظروا جميعا اتجاه تميم ومازن ليقول تميم وهو ينظر لهانم:

_خلاص يا حضرة الظابط انا مش عايز اعمل محاضر ولا حاجة انا وبنت عمي هنحل الموضوع مع بعض

نظرت له هانم بصدمة بينما ينظر كلا من المعلم عطوة ودونجل لبعضهم بذهول لتقول بعدما استوعبت الامر:

_بنت عم مين ياعم انت..انت الضرب علم في نفوخك ولا ايه

وقف امامها بشموخ رغم علامات الضرب البادية علي وجهه وهو يضع يده بجيوب بنطاله:

_ايوة بنت عمي..عمي محمد فايز البدري

تأوه بوجع وهو يضع يده علي وجهه من آلم فكه اثر الحديث المتواصل لتزدرد لعابها بزهول وهي تتفوه بأول ما ورد علي عقلها:

_احيييييييه..
******************************

#الاسطى_هانم
#هند_محمود_صديق
#يتبع...