الفصل الخامس والعشرون

عاد جابر وسعيد وليندا إلى مصر بعد يومين لم يخبر سعيد أحدا عن ميعاد قدومه وركب سيارة مع جابر من المطار ونزل أمام الفيلا وفتح له الحرس بعدها دخل كانت شيرين تجلس بالجنينة وحينما رأته ركضت نحوه واحتضنته

_ ازيك يا شيرى وحشتينى
= انت اللى وحشتنى اكتر يا سعيد
_ عملتى ايه فى غيابى
= هعمل ايه يعنى ولا اى حاجه قاعده فى الفيلا
_ امال اخواتك فين
= مصطفى اخد لمياء واسامه علشان يتفسحوا
_ كويس ، طب ومريم فين
= كانت قاعده معايا من شويه بس خرجت مع ايتن صاحبتها
_ يعنى كلهم خرجوا وسابوكى لوحدك
= عالم واطيه بعيد عنك
_ هههههههه تصدقى وحشنى دمك الخفيف
= طمنى عملت ايه فى السفريه
_ خلصت الشغل اللى كنت مسافر علشانه واتفسحت شويه هناك ورجعت
= هايصه معاك يا معلم ، اعمل حسابك المره اللى جايه هسافر معاك
_ انتى تؤمرى يا قمر
= طب قوم خد شاور على ما اقول لمروه تجهز الاكل لانى جعانه ومأكلتش اى حاجه من الصبح
_ وحياتك عندى انا كمان ما اكلتش فى الطياره
= طب يلا بسرعه خد الشاور بتاعك على ما الاكل يجهز
_ حاضر يا ستى

ذهب سعيد لكى يستحم وبعدها خرج لشيرين لكى يتناولون العشاء وجلسوا مع بعضهم فكان قد جاء مصطفى ولمياء ومريم وصغير العائلة اسامة

_ حمد الله على السلامه يا سعيد
= الله يسلمك يا حبيبى

فسألته مريم

_ ليه ماقولتش انك راجع النهارده كنا روحنالك المطار
= حبيت اعملها مفاجأه بس يا خساره رجعت ملقيتش حد موجود غير شرين

فردت شيرين

_ انت مستقل بيا ولا ايه يا سعيد ده انا بحبك
= لا طبعا يا شيرى انتى قد الدنيا كلها
_ ايوه كده اظبط

فردت لمياء

_طمنى عليك عملت ايه فى امريكا
= خلصت الشغل اللى هناك ومضيت عقد انتاج دواء جديد هنبدأ فيه ليلة رأس السنه
_ يعنى بعد 6 شهور
= بالظبط كده
_ وليه التأخير ده كله
= على ما نجهز خط الانتاج ونخلص الموافقات من وزارة الصحه
_ ربنا معاك يا سعيد

فسأله مصطفى

_ طمنا عليك انت عملت ايه فى امريكا دى اول مره فى حياتك تسافر فى حته بره مصر
= اقولك ايه يا مصطفى ده عالم تانى خالص عمرى ما كنت اتخيل انى اشوفه فى يوم من الايام حاجات عمرى ما شوفتها غير فى الافلام الاجنبى
_ ههههههههه يخرب عقلك اوعى تكون فضحتنا هناك
= لا يا عم مش لدرجة الفضيحه انا يادوب كنت بتفرج وبس ، عارفين كنت عامل زى مين
_ زى مين يا فالح
= كنت عامل زى القروى اللى بهرته اضواء المدينه ، بالرغم انى سايب الاقصر تقريبا من سنه وعشت هنا فى القاهره بس برضه الحياه فى امريكا مختلفه تماما عن الحياه فى القاهره ، انا اول مره انزل فيها القاهره حسيت برهبه المكان الجديد اللى انا جاى اعيش فيه ، نفس الاحساس ده جانى اول ما ركبت الطياره من مطار القاهره

فقالت مريم

_ انت بس علشان دى اول مره تسافر بره مصر لكن بعد كده هتتعود على كده

ثم اتبع مصطفى
_ طمنى ايه اخبار جابر ايه ، رجع معاك ولا لسه فى امريكا
= رجع معايا هو وليندا ، وعلى فكره هو قاعد فى الفيلا بتاعته اللى جمبنا هنا ابقى كلمه وروح باركله
_ اباركله على ايه بالظبط
= ليندا حامل
_ ايه ده بجد
= ايوه بجد
_ شكلها كده جابر مش هيعرف يخلص من المشاكل ابدا
= ليه بتقول كده
_ موضوع حمل ليندا هيخلى جابر يهتم بيها اكتر من الاول وده ممكن يزود الغيره عند ريهام اللى اكيد امها بتشحن فيها طول الفتره اللى جابر كان مسافر فيها يعنى كده اعتبر الفتره اللى جايه ممكن تقلب بسواد الحلل على دماغ جابر
= لا يا عم مش للدرجه دى ، وبعدين جابر عاقل وهيعرف يفصل كويس واكيد هيتحكم فى غيرة ريهام
_ اتمنى
= طب يلا تصبحوا على خير بقى

فردت عليه مريم

_ رايح فين خليك سهران معانا
= معلش يا مريم انا تعبان وعاوز انام لان عندى شغل مهم بكره
_ شغل ايه هو انت لحقت ترتاح من السفر
= اعمل ايه الشغل مش بيرحم ده غير افتتاح الشركه الجديده بعد اسبوعين يعنى الواحد مضغوط على الاخر ومفيش اى وقت
_ حرام عليك اللى بتعمله فى نفسك ده يا سعيد انت عمرك كده بيضيع
= عمر ايه اللى يضيع لسه العمر قدامنا طويل
_ بيتهيألك
= ليه هو انا هموت قريب ولا حاجه
_ بعد الشر عليك متقولش كده تانى
= اصل انتى محسسانى انى عندى 70 سنه
_ قصدى ان الشغل هيسرق عمرك لحد ما تلاقى نفسك فعلا عندك 70 سنه وانت واقف مكانك
= انا فاهم قصدك كويس
_ كويس انك فاهمنى
= اوعدك الايام اللى جايه هنظم شغلى واشوف حياتى
_ ياريت
= طب يلا تصبحوا على خير

تركهم سعبد وذهب بغرفته لكى يستريح

على الجانب الأخر بعدما وصل جابر الى المنزل وسلم على ريهام وجلسوا قليلا قرر أن يرتب كل شئ من البداية فجلس امامهم وقال

_ النهارده اول ليله لينا مع بعض كلنا فى بيت واحد علشان كده لازم نحط النقط على الحروف
= قصدك ايه يا جابر
_ قصدى يا ريهام احط القواعد اللى هنمشى عليها علشان نعيش مرتاحين وميحصلش اى مشاكل والكلام ده ليكم انتوا الاتنين فاهمانى يا ليندا
= فاهمه
_ وانتى يا ريهام
= فاهمه
_ انتوا الاتنين على ذمتى ، وانتوا الاتنين ليكم حقوق عندى على عينى وراسى ، انتوا الاتنين حقوقكم قد بعض ومفيش واحده احسن من التانيه ، وبمناسبة الحقوق كل واحده فيكم ليها ليله وهعمل جدول لطل واحده فيكم هنمشى عليه ، وبالنسبه للفسح والخروجات برضه هعملها بجدول فاهمين
= فاهمين
_ الاسبوع عباره عن سبع ايام كل واحده فيكم هتاخد 3 ايام ، ريهام هتاخد السبت والاتنين والاربع ، وليندا هتاخد الاحد والثلاثاء والخميس ، ويوم الجمعه ده اجازه ليا هقعد فى اوضتى الخاصه وطالما انا موجود فى الاوضه بتاعتى وقافل عليا يبقى مختلى بنفسى وبفكر يبقى ممنوع نهائى اى واحده فيكم تقرب من الاوضه فاهمين
= فاهمين
_ عاوزكم تحبوا بعض وتخافوا على بعض لانى اقسم بالله ورحمة ابويا وامى اللى هتفكر فيكم انتوا الاتنين تتعوج او تعمل مشاكل هتشوف منى وش كلنا هنتفاجئ بيه ، انا اه طيب وحنين وممكن اجيبلكم نجمه من السماء طالما ماشيين كويس لكن اللى هتفكر تتعوج ماتلومش غير نفسها

فردت ليندا قائلة
= مالك ناشف كده ليه
_ دى اول ليله لينا مع بعض ولازم احط القواعد علشان انا عارف دماغ الستات كويس فى لحظه ممكن تقلبوا عليا
فردت ريهام
= متخافش يا حبيبى١ مفيش اى مشاكل هتحصل
_ اتمنى ، النهارده السبت وده هيبقى دور ريهام فى اى مشاكل عند اى واحده فيكم
= لا مفيش مشاكل
_ طب يلا كل واحده فيكم على السويت بتاعها وانا هخلص مكاملة شغل واطلع

مر اسبوع كان عبارة عن تجهيزات وتنظيمات وفى صباح يوم جديد كان سعيد جالسا بمكتبه فى الشركة صباحا ودخل عليه جابر

_ انت هنا من امتى
= من ساعه تقريبا
_ وايه اللى جابك بدرى كده ده
= بدرى من عمرك ده الساعه دلوقتى 8 الصبح
_ ده معناه انك هنا من الساعه 7 ، هو فى رئيس مجلس ادارة شركه كبيره زى دى يوصل قبل الموظفين احنا مواعيد الشغل هنا بتبدأ من الساعه 8
= عارف ، ولازم الموظفين لما يوصلوا يلاقونى موجود ولما يمشوا كمان اكون موجود ، علشان اللى يفكر بس يقصر لأسباب تافهه الجزاء هيكون كبير
_ انت حر ده شغلك ومشيه بالطريقه اللى تريحك
= سيبك من المواعيد والكلام الفاضى ده وخلينا فى الشغل المهم ، هنقسم الشغل بينى انا وانت ازاى
_ انت هتفضل رئيس مجلس الاداره عادى جدا ، وانا هبقى النائب بتاعك علشان اريحك وارتاح انا كمان ونفضى للمواجهه اللى هتبقى فى اقرب وقت
= هى استر كلمتك
_ لا لسه ، استر مش هتكلمنى دلوقتى خالص
= ازاى يعنى ، ده احنا راجعين من السفر بقالنا اكتر من اسبوع تقريبا
_ هتستنى ترتب ورقها كويس قبل ما تقعد معايا ده غير انها هتستنى انا اطلب تعجيل اللقاء وانا مستحيل اطلب حاجه زى دى
= طب ترتب ورقها وانا فاهم ده ، لكن ليه تطلب تعجيل اللقاء اصلا ، انت ناسى انك طلبت من سيرينا تقابل استر يبقى ليه هتطلب تانى
_ عشان استر شخصيتها مركبه شويه بس
= مركبه ازاى مش فاهم
_ استر بتحب تلاعب حد يكون فى مستواها او اقوى منها وبتستمتع باللعبه دى لكن جواها غرور يخليها عامله زى الملكه اللى قاعده على العرش واللى عاوز يقابلها لازم يركع قبل مايشوفها وده انا مستحيل اعمله ، لانى لو عملت كده هبان ضعيف قصادها وانا اصلا فى مركز قوه ، علشان كده هستنى لما استر تكلمنى بنفسها وساعتها اتفرج انا هعمل معاها ايه
= ماشى يا سيدى لما نشوف
_ سيبك من الكلام ده دلوقتى و قولى عملت ايه فى حفلة الافتتاح اللى بعد اسبوعين
= متقلقش هبه يعتبر خلصت كل حاجه مش باقى غير حاجات بسيطه
_ حاجات ايه دى
= هبه اتفقت مع الاوتيل على تجهيز كل حاجه وبلغت الصحافه والتليفزيون بالحفله وعزمت معظم الشخصيات اللى هتحضر مش باقى غير الوزراء والمسئولين ودول لازم نعزمهم انا وانت بشكل شخصى
_ خلاص سيب الموضوع ده عليا وانا هعزمهم بنفسى
= طب وتأمين الحفله
_ متخافش سيب برضه التأمين عليا
= كده تمام
_ طب وبالنسبه للمناقصه بتاعة شركة المقاولات عملت ايه فيها
= امبارح كلمت معتز ويوسف وقالولى ان النهارده هيخصلوا اخر حاجه وبكره هنعمل اجتماع معاهم ونناقش كل حاجه
_ عاوزين نسرب لأحمد الحارونى ان احنا داخلين المناقصه دى
= متخافش يا اخويا احمد الحارونى عرف ان احنا داخلين المناقصه
_ مين قالك انه عرف
= هو بنفسه اتصل بيا امبارح وسألنى
_ غريبه ده كان قاعد معايا امبارح ومجابش سيرة المناقصه
= احمد الحارونى دماغه داهيه واكيد بيرتب لطريقه يكسب بيها المناقصه من غير ما يبان ان فى اى عداوه بينا وعلشان مايعملش مشاكل معاك انت بالذات خصوصا انك ابن عمه وجوز اخته ده غير ان سليم متعلق بيك ، يعنى لازم لما يتعامل معاك يبقى حريص جدا لان اى غلطه فى التعامل هتخسره كتير جدا ، بس فى حاجه انا مش فاهمها
_ حاجة ايه
= طالما بتكره احمد الحارونى ليه اتجوزت اخته
_ مين قالك انى بكره احمد
= امال ليه مصمم تدخل قصاده فى مناقصه كبيره زى دى وانت عارف ومتاكد انه اكيد هيحارب علشان يكسبها
_ بص يا سعيد هعلمك حاجه للمستقبل العلاقات الشخصيه دى حاجه والشغل حاجه تانيه خالص ، احمد الحارونى ابن عمى واخو مراتى ده على عينى وراسى لكن شغلى انا معرفش فيه صحوبيه ولا جيره ولا حتى نسب وفى حاجه كمان لازم تعرفها فى الشغل مفيش حاجه اسمها عداوه على طول الخط ولا صحوبيه على طول الخط فى الشغل فى حاجه اسمها مصلحه ولازم كل واحد يدور على مصلحته بس اهم حاجه يدور عليها بشرف فاهمنى يا سعيد
= فهمتك
_ سيبك من الشغل والكلام الرخم ده وقولى انت مش ناوى تتجوز
= حتى انت كمان هتكلمنى فى الموضوع ده
_ بص يا سعيد انا كنت فى يوم من الايام مكانك ورافض فكرة الجواز وكنت مقرر اكمل حياتى لوحدى
= وايه اللى خلاك تغير رائيك كده وتتجوز اتنين مش مره واحده
_ اتجوزت ليندا علشان هى خلتنى احبها ، واتجوزت ريهام علشان بحبها
= يعنى انت بتحب ليندا ولا ريهام
_ هبقى كداب لو قولتلك بحب الاتنين قد بعض ، بس كل واحده فيهم ليها مميزات مش عند التانيه وكل واحده ليها ظروف غير التانيه ، عندك مثلا ليندا اعرفها من اكتر من 20 سنه وكنا اصحاب من زمان وتعتبر الصندوق الاسود بتاعى تعرف عنى كل حاجه تقريبا من اول اسرار الطفوله والمراهقه لحد اسرار الشغل غير كل ده تتمنى اشاره من صباعى
= هى علاقه حلوه بصراحه ، طب وريهام
_ ريهام دى حاجه خاصه ، حبيتها قبل ما اعرف انها بنت عمى يمكن لو كنت عارف من الاول كنت كرهتها وماديتش اى فرصه لنفسى انى احبها وهى كانت عارفه كده كويس وكانت حريصه جدا انى معرفش
= برضه مقولتش حبيتها ازاى
_ فى الاول مكانش حب كنت لما بقعد معاها بحس براحه غريبه كنت دايما اشوف فيها صورة امى معرفش ليه ومع الوقت حبى زاد ليها بس لما عرفت انها بنت عمر وامل الحارونى اتجننت وقطعت علاقتى بيها
= طب ايه اللى خلاك ترجعلها بعد ما قطعت علاقتك بيها
_ هى اللى اجبرتنى ارجعلها
= يعنى ليندا اجبرتك تحبها وريهام اجبرتك ترجعلها انت ايه حكايتك بالظبط مفيش مره تعمل حاجه من دماغك
_ الراجل اللى يقولك انه يقدر يسيطر على الست يبقى غبى ، الست بتسيبك تسيطر بمزاجها لكن لو حبت تتنمرد ساعتها هتشوف اللى عمرك ما شوفته ، احنا غلابه جدا قصاد بنات حواء ، بنعمل كل حاجه هما عاوزينها وفاكرين ان احنا بنعمل كده من دماغنا ، احنا كبيرنا نزعق ونتعصب لكن بننزل على مفيش قصاد ضحكه من الست ، بس مش اى ست تعرف تعمل كده للأسف
= ده انت باين عليك شايل كتير
_ عارف يا سعيد انا عرفت جميع انواع الستات ، لما عيشت فى مصر شوفت كتير ولما عيشت فى امريكا شوفت اكتر بس الشاطر اللى يعرف يتعامل مع الست بدماغها علشان هو يرتاح وهى كمان ترتاح
= نظريا كلامك صح جدا لكن عمليا هتواجهك صعوبات كتير ومشاكل اكتر خصوصا مع واحد زيك متجوز اتنين وكل واحده فيهم هتعوز تسحبك ليها على حساب التانيه
_ من ناحية المشاكل انا عارف ان هيبقى فى مشاكل ساعتها هبقى اتعامل معاها بس اهم حاجه هى الاساس فى الهندسه درست حاجه مهمه جدا وهى ان طول ما اساس العماره سليم ومتأسس صح يبقى العماره هتقاوم اى زلزال يحاول يوقعها واساس البيت السليم دايما بيبقى من الراجل لو كان الراجل قوى يبقى البيت هيستمر اما بقى لو كان ضعيف يبقى البيت هيوقع مع اول هزه ارضيه
= عندك حق
_ سيبك منى انا دلوقتى وخلينا فيك انت ، انا عاوز افرح بيك بقى
= قريب جدا هتفرح بس اتأكد من حاجه الاول وبعد كده افرحك
_ يعنى فى واحده
= تقريبا فى بس لازم اتاكد الاول
_ يا مسهل

فجأه الباب خبط ودخلت مريم الصفوانى عليهم

_ مريم !! خير فى حاجه ، حد فى البيت حصله حاجه
= اهدى يا عم انت مفيش حاجه
_ طب دخلتى ازاى من غير ما السكرتيره تبلغنى
= انا قولتلها عاوزه اعملك مفاجأه
_ احلى مفاجأه ياستى
= ازيك يا جابر معلش اتشغلت مع سعيد وماخدتش بالى
_ ولا يهمك يا ستى ، على العموم انا كويس
= كويس جدا انى لقيتك هنا
_ خير عاوزه حاجه
= عاوزه استأذنك فى سعيد النهارده
_ اشمعنا
= عاوزاه فى مشوار مهم
_ اهو عندك يا ستى خديه
= بجد يعنى مش هيحصل حاجه للشغل
_ لا ياستى انا موجود ومفيش حاجه هتحصل

رد عليه سعيد

_ ايه اللى انت بتقوله ده ياعم انت احنا معانا شغل
= وانا بقولك ان انا مكانك

فرد عليه مريم

_ تصدق يا جابر ان انت جدع جدا ، طالما كده يبقى يلا يا استاذ انت قدامى
= طب ممكن تفهمينى احنا رايحين فين
_ انت محجوز اليوم كله اياك تسأل احنا رايحين فين او هنعمل ايه
= حاضر ياستى تحت امرك

فرد عليه جابر ضاحكا
_ شكلك كده وقعت فى دايرة الاجبار وهتوقف فى الطابور قريب
= طابور ايه ده بالظبط
_ لا دى حكايه قديمه ماتشغليش بالك بيها ، يلا خدى الاستاذ ده
= ماشى يا دياب بتورطنى
_ يلا عقبال الورطه الكبيره انت ابن حلال وتستاهل

اخدت مريم وسعيد وخرجوا من الشركة

_ سيب عربيتك هنا وتعالى معايا
= هو انا مخطوف ولا حاجه
_ حاجه زى كده
= طب ممكن اعرف انتى واخدانى على فين
_ نص ساعه وهتعرف كل حاجه بالظبط يلا اركب علشان متاخرين
= متاخرين على ايه
_ بقولك ايه اركب من غير ولا نفس
= حاضر يا ستى ركبت اهو

اتحركت السيارة وبعدها بحوالى نصف ساعة من التجول فى الطرقات وقفت مريم امام دار ايتام

_ انتى جايبانا هنا ليه
= تعالى معايا وانت هتعرف كل حاجه

نزلت مريم وسعيد من السيارة وبعدها دلخول إلى دار الأيتام وبمرجد أن لاحظ الأطفال مريم فجرو عليها جميعا واحتضنتهم كلهم ، ولكن كان هناك طفلا يبدو على وجهه الحزن كان ينظر كثيرا إلى مريم وإلى سعيد فذهبت مريم له وامسكته ثم أتبعت قائلة

_ مالك يا ادهم شكلك مش مبسوط
= انتى ليه اتاخرتى
_ معلش يا حبيبى انا اسفه بس عمو سعيد كان معاه شغل .... يلا سلم عليه

فرد سعيد على الطفل

_ ازيك يا حبيبى
= اهلا
_ واضح كده ان انا دمى تقيل

سالت مريم أدهم

_ مالك كده يا ادهم
= مفيش
_ انت هتكذب عليا يا ادهم
= هو سعيد ده خطيبك
_ ههههههههه هو ده اللى مدايقك ، لا يا سيدى سعيد ده ابن عمى وصاحبى كده زيك
= لا مفيش حد صاحبك غيرى
_ انت مفيش حد زيك ابدا بس سعيد ده طيب وغلبان ايه رائيك يبقى صاحبنا احنا الاتنين وانا واثقه انك هتحبه
= لما نشوف
فى وسط الحديث جاءت امرأة يبدو أنها مشرفة الدار كانت تدعى سمر وتحدثت مع مريم عن سبب التأخير ثم قامت مريم بأن عرفتها على سعيد وبعدها وبعدها قررا أن يصطحبا الأطفال فى اتوبيس لم يكن يفهم سعيد شيئا ، وبعدها اصرت مريم أن تركب هى وسعيد الأتوبيس مع الأطفال وأن يتركو السيارة جانبا
كان سعيد لا يعرف شيئا فأراد فهم الامر

_ ممكن تفهمينى الحكايه بالظبط
= هقولك يا سيدى ، كل الحكايه ان انا اتعرفت على سمر من 5 سنين لما كنت بطلع مع الجامعه فى القوافل الخيريه اللى بتقدم مساعدات للقرى الفقيره والحاجات اللى زى دى وسمر دى شعلة نشاط وبتحب تساعد الناس وبعد ما خلصنا جامعه قالتلى انها عاوزه تعمل دار للأيتام بس طبعا مش هتقدر على الموضوع ده لوحدها لانه موضوع مكلف جدا وانت عارف مشروع زى ده مفيش فيه اى ربح علشان كده كلمتنى وانا كلمت بابا واتحمس جدا واتبرع بملغ كبير وكلم اصدقاءه واللى فعلا اتبرعوا وفعلا عملنا الدار دى زى ما انت شايف
_ انا كده فهمت ، طب احنا رايحين فين دلوقتى
= احنا كل شهر بنعمل رحله للأطفال والنهارده رايحين دريم بارك لانهم بقالهم فتره طالبين يروحوا الملاهى
_ انا حاسس انى بعرفك لأول مره فى حياتى
= لأنك ببساطه انت من يوم ما عرفتنى ماسالتنيش بعمل ايه فى حياتى كان كل همك تحمينا وتنفذ وصية عمك
_ عندك حق ، انا هصلح غلطى
= اهم حاجه دلوقتى عاوزاك تندمج مع الاطفال عاوزاهم يحبوك
_ ليكى عندى اخليهم يعشقونى مش بس يحبونى
= انا واثقه من كده
_ وايه حكاية ادهم دا واضح انه متعلق بيكى بزياده شويه
= انت اخدت بالك
_ اخدت بالى من ايه ده قاعد وحاطط عينه علينا من اول ما اتحركنا وعينه بتطق شرار وعاوز يولع فيا
= ادهم ده ليه ظروف خاصه شويه
_ ظروف ايه دى
= ادهم اساسا كان ابن ناس اغنياء جدا بس عمه نصب على ابوه وسرق منه كل حاجه وهرب على لندن من 10 سنين وبعدها ادهم كان مسافر مع بابا ومامته وفجأه العربيه اتقلبت بيهم وماتوا بس ادهم خرج من الحادثه بأعجوبه وطبعا بعد ما خسر كل حاجه مكانش فى حل غير ان الحكومه تحطه فى دار ايتام بس من 3 سنين كان فى واحد رافع قضيه على الحكومه علشان ارض الدار بتاعته وكسب القضيه واخد الأرض بالدار وطبعا الحكومه مكانش عندها حل غير انها توزع الاطفال دى على اكتر من دار وكان من نصيبنا ادهم ومعاه كام طفل تانى وانا من يوم ما شوفت ادهم حسيت بانجذاب غريب ناحيته وبقيت اروح الدار كل كام يوم علشان اشوفه واقعد معاه واحيانا كنت باخده افسحه وارجعه الدار تانى
_ انا دلوقتى فهمت ايه سر تعلقه بيكى بزياده كده

بعدها وقف الاتوبيس أمام الملاهى وكانت تود سمر أن تملى عليهم التعليمات ولكن قاطعها سعيد بأنها تترك له شأن الأطفال وهو سيحافظ عليهم
نزل الاطفال من الأتوبيس وكانوا بصحبة سعيد الذى كان يلعب معهم ونسى كل هموم حياته ونسى كل شئ ولم اندمج فى اللعب مع الاطفال ولك يفعل شئ سوى ذلك

كانت تقف سمر بصحبة مريم ينظرون إلى سعيد وهو يلعب مع الأطفال بعدما اندمجت معه الأطفال وفرحو بوجوده

_ ايه سعيد دا ، ده قدر يسيطر على الاطفال فى وقت قياسى جدا وواضح كمان ان الاطفال حبوه
= هو ده سعيد اى حد يعرفه لازم يحبه
_ ايه يا موزه انتى وقعتى ولا ايه
= مش عارفه اقولك ايه يا سمر
_ مش محتاجه تقولى يا حبيبتى باين فى عنيكى
= ايه هو اللى باين فى عنيا
_ يا مريم احنا اصحاب بقالنا اكتر من 5 سنين وعلى ما اظن انى اعرفك كويس جدا ولما اقولك انك بتحبى سعيد يبقى بتحبيه ، وبعدين دى اول مره تجيبى حد معاكى الدار
= صدقينى يا سمر مابقتش عارفه
_ ازاى يعنى مش عارفه
= متلخبطه وحيرانه ومش قادره ارسى على بر
_ يبقى بتحبى
= جايز
_ لازم تفكرى كويس وتشوفى انتى عاوزه ايه
= بقالى كتير جدا بفكر ومش عارفه اوصل لقرار حتى انا سألت اخواتى وهما فرحانين جدا بالموضوع ده بس برضه لسه ماوصلتش لقرار وعلشان كده قررت اقرب اكتر من سعبد يمكن اعرف اوصل لقرار
_ ربنا معاكى ، بس انتى مش ملاحظه ان سعيد مندمج جدا مع الاطفال وبيلعب كأنه واحد منهم
= علشان كده انا جبته النهارده لانى عاوزه اتأكد من حاجه
_ تتأكدى من ايه
= سعبد عاش محروم من الطفوله وشال الهم بدرى جدا وبعد ما لمياء خلفت بقى يقضى معظم وقته مع ابنها وبينسى الدنيا كلها معاه فى الاول كنت شاكه انه بيعمل كده علشان ده ابن لمياء ومصطفى لكن دلوقتى بيلعب مع الاطفال كأنه طفل زيهم
_ سعيد محتاج يعيش حياته
= هو ده اللى انا هعمله الفتره اللى جايه