الفصل الرابع والعشرون

كانت تجلس استر ومعها البرت بعدما اخبرتهم سيرينا بما حدث بالاجتماع وما قاله جابر وطلبه لها بمقابلتها
قال البيرت وهو مبهورها بقدرات جابر
_ ايه دا يا جابر ، معقول فى حد بالذكاء ده كله
= مش قولتلك ان احنا فى حرب شرسه ، حرب مختلفه كتير عن الحرب اللى كانت ضد احمد الحارونى
_ احمد الحارونى بالنسبه لجابر ولا حاجه
= اللى مخلى احمد الحارونى قادر يصمد لحد دلوقتى هو وجود جابر فى صفه ، لكن احمد الحارونى من غير جابر ينتهى فى لمح البصر
_ بس فى حاجه انا مستغربها
= حاجة ايه
_ مش غريبه ان جابر يحرق ورقه بسهوله كده
= قصدك علشان قال لسيرينا انه عارف انهم شركاء لينا
_ مش بس كده ، لا ده كمان قالها انه موافق على بيع اسهم احنا مطلبنهاش وكنا بنرسم خطه علشان نطلبها
= علشان ببساطه ده ورق محروق
_ حتى لو كان ورق محروق ، كان يقدر يلعب بيه
= ومين قالك انه مش بيلعب بيه جابر استغل اول فرصه يقدر يخلص بيها من الورق المحروق وعمل كده بمهاره ملهاش مثيل جابر قدر يجبرنى اقابله واقعد معاه علشان يتحكم ويفرض شروطه
_ هو فى حد يقدر يفرض شروط على استر يعقوب
= معلش يا البيرت سيبه المره دى يحس بنفسه ويفرض شروطه علشان لما اجيبه تحت رجلى وادهسه زى الصرصار وقتها هطلع عليه كل القديم
_ تفتكرى هيطلب ايه قصاد بيع الاسهم
= هيطلب سعد الحارونى
_ ايه اللى يخليكى متأكده كده
= علشان يرتاح من ناحيته ويفضى لحربه معانا ، متنساش ان سعد بالنسبالهم زى الشوكه فى الضهر
_ هى وجهة نظر منطقيه ، بس لو طلب سعد انتى هتسلميه
= لا طبعا انت مجنون
_ طب هتعملى ايه لو طلبه
= ولا اى حاجه ، انا معرفش مكان سعد من يوم ما هرب من السجن
_ بس كده الاتفاق ممكن يبوظ
= متخافش الاتفاق هيتم زى ما انا عاوزه وبكده هبقى حطيت رجلى فى قلب شركات الصفوانى ودى هتبقى بداية النهايه
_ انا برضه مش مصدق اننا اخيرا هندخل شركة الصفوانى
= لا صدق يا البيرت ، وواحده واحده هنستولى على الشركه كلها مش مجرد نسبه من الاسهم
_ هتقابلى جابر امتى
= لسه يا البيرت الصبر
_ صبر على ايه مش فاهم
= لازم نأمن نفسنا كويس ونأمن مكان الاجتماع علشان اى غدر ممكن يحصل
_ عندك حق
= ومن النهارده هنسيب المزرعه دى
_ ليه كده
= وارد جدا يكون جابر عارف طريقها علشان كده لازم نغير المكان فى اسرع وقت
_ تمام

من ناحية أخرى فى فيلا أحمد الحارونى كان جالسا ويفكر فى أمر سليم إبنه الذى يأبى أن يعيش بالصعيد ويريد الانتقال للقاهرة ويرفض العيش مع جدته بنفس المنزل ، كان يفكر أحمد بتلك الأمر ولم ينتهى من تفكيره حتى امسك بهاتفه واتصل بجابر لعله يجيبه فرد عليه جابر فى تلك المرة بعدما كان هاتفه مغلق طيلة الأسبوع الماضى

_ ازيك يا احمد
= الحمد لله بخير ... انت اخبارك ايه
_ كله تمام ، خلصت شغلى هنا وراجع مصر بعد يومين
= طب كويس انا كنت بتصل بيك علشان اعرف انت جاى امتى
_ كمان يومين وكدا كدا بعد ما اوصل القاهره هاجى الاقصر علشان اخد ريهام
= مفيش داعى تتعب نفسك ، انا نازل القاهره بكره وهاخد ريهام معايا
_ طب كويس انت كده هتوفر عليا
= على فكره احنا نازلين كلنا القاهره
_ كلكم مين بالظبط
= انا وفاتن وامانى والاولاد
_ غريبه دى
= انا معايا مشكله ومحتاجلك
_ مشكلة ايه
= مشكله بخصوص سليم
_ ماله سليم انا مكلمه من شويه وكان كويس
= هحكيلك كل حاجه يمكن نلاقى حل

وقص عليه أحمد أمر سليم وافهمه ما يقدر عليه

_ هو ده اللى انا كنت عامل حسابه وخايف منه
= وايه الحل دلوقتى
_ الكلام مش هينفع فى التليفون لما ارجع مصر هقعد معاك ونفكر فى حل بس اهم حاجه دلوقتى تسمع كلام سليم ولازم يحس ان احنا كلنا حواليه
= هو ده اللى انا هعمله علشان كده قررت اقعد فى القاهره الفتره دى زى ما سليم عاوز
_ هتقعد فين فى القاهره
= هقعد فى فيلا التجمع
_ لا متقعدش فى التجمع وروح فيلا الشيخ زايد
= اشمعنا فيلا الشيخ زايد يعنى
_ علشان تبقى جمبى وجمب سعيد الصفوانى وبالطريقه دى اقدر اوفر الحراسه المطلوبه لينا كلنا ، الفتره اللى جايه فتره صعبه ولازم نبقى فى مكان واحد علشان اقدر احميكم
= خير فى مشاكل
_ طالما خالك لسه هربان يبقى فى مشاكل
= انا تعبت من الموضوع ده
_ تعبت ايه يا احمد ..... هو انت لسه شوفت حاجه
= تفتكر خالى ناوى يهرب وخلاص ولا عاوز ينتقم
_ لو ناوى على الهروب وخلاص يبقى ريح واستريح ، اما بقى لو بيفكر فى انتقام يبقى المره دى مش هينفع مهاه سجن وبس
= ايه يا جابر انت عاوز تقتل خالى
_ ههههههه ضحكتنى يا احمد ، ده انت قتلت جدك وحسين وعياله يعنى جات على خالك
= هتصدقنى لو قولتلك بالرغم كل اللى عمله خالى مش قادر اكرهه ، خالى طول عمرى بعتبره صاحبى وابويا التانى
_ يبقى استحمل لما صاحبك او ابوك التانى يقتل ابنك ولا يقتل مراتك او يقتلك انت شخصيا
= ليه يا جابر مصمم تحطنى ما بين نارين
_ علشان ملهاش حل تانى يا صاحبى
= لا ليها حل
_ ايه الحل ده يا فالح
= انا ممكن اوصل لخالى ونتصالح معاه ونعوضه واقدر كمان اسفره اى بلد تانى يعيش فيها وبكده يبقى كلنا استريحنا
_ هههههههههه صدقتك انا كده ، خالك لو ناوى على الانتقام مفيش حاجه هتعوضه ، وبعدين انت مستعد تضحى بمراتك وعيالك لكن انا مش مستعد اضحى بمراتى ولا ابنى ، مش مستعد يجى اليوم اللى اشوف فيها ابنى مقتول على ايد خالك زى ما امى ماتت على ايد امك
= خلاص يا جابر بقى كفايه مش قادر اسمع الكلام ده تانى
_ خلاص براحتك ، المهم انت هتسافر القاهره امتى
= بكره او بعده بالكتير
_ طب تمام ، وانا كمان زيك بس اتطمن ان ليندا تقدر تسافر هجيبها واجى على طول
= ليه ليندا مالها
_ ليندا حامل
= ايه ده بجد ، الف مبروك يا جابر ليه مقولتش من الاول
_ اعملك ايه انت اللى اخدتنى فى مواضيعك ونسيت اقولك
= على العموم الف مبروك
_ الله يبارك فيك يا احمد
= طب سلام دلوقتى وهكلمك تانى
_ سلام

من ناحية أخرى بالفيلا كان يجلس سليم يقلب فى هاتفه فى مواقع التواصل الاجتماعى ودخلت عليه أمل الحارونى

_ ازيك يا حبيبى
= كويس يا تيته
_ انت ليه عاوز تسيب البلد هنا يا حبيبى
= محتاج اغير جو وابعد شويه واشوف اصحابى اللى بقالى كتير ماشوفتش حد فيهم
_ بس لازم ترجع تانى يا حبيبى ، هنا بلدك واهلك وكلنا بنحبك
= عارف يا تيته
_ هو انت بتكلم جابر
= ايوه بيكلمنى كل يوم
_ اه قولتلى انا عرفت انت ليه عاوز تسافر
= لا يا تيته انا مش عاوز اسافر علشان جابر ، انا عاوز اسافر لانى حاسس انى غريب هنا
_ لا يا سليم انت مش غريب هنا ، هنا بلدك واهلك ومسيرك فى يوم من الايام هتبقى كبير العيله دى وكبير البلد
= بس انا مش عاوز ابقى كبير العيله ، انا عاوز ابقى نفسى
_ بطل كلام العيال ده ، انت راجل واتخلقت علشان تبقى كبير ولا انت قعدتك مع جابر بوظت دماغك
= بالعكس جابر فتح عنيا على حاجات كتير كان مستحيل اتعلمها وانا عايش هنا
_ حاجات ايه دى بقى
= علمنى احب الناس زى ما بحب نفسى
_ قصدك ايه بالكلام ده
= لا مقصدش حاجه يا تيته

نظرت أمل الحارونى إلى هاتفه واملقت النظر فيه ثم قالت

_ استنى كده ورينى التليفون ده
= ماله التليفون
_ هاته ثانيه بس
= اتفضلى يا تيته
_ مش دى صورة اسماء مرات ابراهيم واولادها
= ايوه يا تيته فيها ايه دى
_ الصوره دى جديده
= ايوا من كام يوم
_ ومش ده جابر وليندا اللى ظاهرين فى الصوره من بعيد
= فين ده
_ ركز كويس فى الصوره
= ولنفرض ان جابر وليندا ظاهرين فى الصوره يهمك فى ايه
_ طب ابعتلى الصوره دى على تليفونى
= ليه يا تيته
_ ابعتلى بس الصوره
= حاضر

أرسل سليم الصوره لأمل الحارونى وبعدها تركته وذهبت

فى نفس الوقت كانت تجلس ريهام بغرفتها ودخل عليها أحمد اخيها

_ مالك يا ريهام قاعده لوحدك على طول
= بينى وبينك مش عاوزه اشوف امك
_ ليه كده
= ياعم دى كل ما تشوف تسمعنى كلام بارد على جابر وانا مش عاوزه اقولها كلام يجرحها
_ خديها على قد عقلها
= انا بحاول اعمل كده على قد ما اقدر
_ انتى بتكلمى جابر
= ايوه بيكلمنى كل بوم
_ هو لسه مكلمنى دلوقتى وقالى انه هيرجع بكره او بعده بالكتير
= ايوا كلمنى وقالى
_ فى موضوع مهم عاوز اكلمك فيه
= موضوع ايه ده
_ عاوزك تحافظى على جوزك وعلى بيتك
= متخافش عليا
_ فى حاجه مهمه لازم تعرفيها قبل ما نسافر القاهره
= خير يا احمد

فجأه دخلت عليهم امل الحارونى

_ ايه ده انتوا متجمعين هنا

فرد عليها أحمد

= ولا متجمعين ولا حاجه انا بس بتطمن على ريهام
_ تطمن عليها بعد ما رميتها الرميه السوداء دى
= هنرجع تانى للموضوع البايخ ده والاسطوانه القديمه
_ لا المره دى عندى اسطوانه جديده
= خير يا امى

نظرت ريهام إلى أحمد وقالت
_ سيبك من الكلام الفاضى ده وقولى ايه الحاجه المهمه اللى كنت عاوز تقولهالى
= استنى لما نشوف امك عاوزه تقول ايه
_ انا مش عاوزه اسمع كلام امك ، ريحنى وقول الموضوع اللى كنت جاى تقوله

ردت عليها أمل الحارونى

_ للدرجه دى بقيتى كارهه كلامى
= خلاص يا امى بقى كفايه
_ حاضر يا احمد انا هسكت

فسألته ريهام مرة أخرى

_ ايه الموضوع اللى عندك يا احمد
= انا حبيت تيجى منى علشان ماتتصدميش بعد ما نسافر
_ خير يا احمد خضيتنى
= انتى عارفه ان جابر وليندا راجعين بعد يومين
_ ايوه عارفه ، كفايه لف ودوران وقول اللى عندك ولا اريحك انا واقول الموضوع مكانك
= تقولى ايه
_ انت بقالك ساعه بتلف وتدور علشان تبلغنى ان ليندا حامل مش كده

فردت أمل الحارونى ولكن لم يبالى لها أحد وقال أحمد لريهام
_ كمان ليندا حامل

= انتى عرفتى من فين
_ عرفت من جابر ، هو اتصل بيا وبلغنى علشان ماتفاجئش
= وانتى مش زعلانه من الخبر ده
_ وهزعل ليه ، انا كمان مسيرى فى يوم من الايام هحمل زيها

فردت أمل الحارونى

_ انتى كمان عاوزه تخلفى من الزفت ده
= الزفت ده يبقى جوزى
_ جوزك سلامات يا جوزك وهو فين جوزك ده ، جوزك اللى قطع شهر العسل علشان ياخد حبيبة القلب ويسافر ويتفسح
= جابر سافر علشان معاه شغل

أخرجت أمل الحارونى هاتفها وفتحت صورة ابراهيم واقتربت بالصورة على وجه جابر وليندا ثم وضعت الهاتف أمام عين ريهام واتبعت بالقول

_ ده حبيب القلب اللى انتى معلقه نفسك بيه اوهمك انه معاه شغل واخد حبيبته وسافر بيها علشان يتفسحوا
= براحته يعمل اللى هو عاوزه
_ انتى من امتى وانتى ضعيفه كده
= انا هجبهالك من الاخر يا امى علشان اريحك ، مهما تعملى انا مش هسمع كلامك وادخل فى حرب انا اول واحده هتخسر فيها ولا عمرى هكون السلاح اللى تضربى بيه جابر ياريت بقى تريحى نفسك

فرد عليها أحمد قائلا

= كفايه يا امى خلاص انتى بقيتى مفضوحه وكرهك باين فى عنيكى ، انا نفسى اعرف جابر عملك ايه علشان تكرهيه بالطريقه دى ومتقوليش موضوع ابن الخدامه ده علشان الموضوع ميستاهلش الكره ده كله
_ قصدك ايه يعنى
= قصدى ان فى سبب تانى خالص لكرهك لجابر ، سبب محدش يعرفه غيرك

لم ترد عليه أمل الحارونى وسكتت وبعدها نظرت إليهم وخرجت من الغرفة فردت ريهام سائلة أحمد


_ تفتكر فى سبب تانى فعلا
= من الطريقه اللى امك اتصدمت بيها دى واضح ان فى سبب تانى وسبب كبير جدا كمان
_ ايه السبب ده بقى
= شكله كده سر جديد من اسرار امل الحارونى اللى كل يوم بتفاجئ بيها ، على العموم سيبك من امك دلوقتى وخلينا فيكى انتى
_ خير يا احمد
= انتى اللى اختارتى تتجوزى جابر وكنتى عارفه انه متجوز ومحدش غصبك علشان كده حافظى على بيتك وجوزك ومتسمحيش لأى حد مهما كان يوسوسلك تخربى بيتك بأيدك
_ عارفه كلامك ده كويس وفاهماه
= طب عاوزك تجهزى نفسك علشان هتسافرى معايا بكره زى ما اتفقنا
_ انا جاهزه