الفصل الثالث والعشرون

انتهى عمر الالفة من الحديث مع جابر وبعدها ذهبوا لغرفة الاجتماعات وجلسوا مع ديفيد وسيرينا

وبعدما جلسوا ورحبوا ببعض بدأت سيرينا بالحديث مع جابر

_ بقالى مده كبيره عاوزه اتعرف عليك يا مستر جابر بس الظاهر كده انك صعب فى التعامل ومش بتحب تتعرف على الناس
= بالعكس انا بحب اتعرف على الناس جدا وسهل جدا فى التعامل وهتشوفى بنفسك دلوقتى
_ امال كنت فين الايام اللى فاتت حماك قلب الدنيا عليك وكان فاكر ان احنا السبب فى حصلك وهددنا جامد بس احنا مقدرين موقفه وقلقه على بنته الوحيده
= مفيش بس حبيت اخد اجازه بجد واقضى شهر عسل جديد مع مراتى بعيد عن الشغل والحراسه والعيون اللى راصدانا فى كل حته
_ اذا كان شهر عسل جديد ربنا يهنيكم ببعض ، بس غريبه ان المعلومه اللى عندى انك لسه متجوز جديد فى مصر
= وفيها ايه دى عادى اتجوز تانى وتالت ورابع طالما حبيبتى موافقه
_ شكلها كده بتحبك ومش بتقدر ترفضلك طلب
= احنا جايين نتكلم فى الشغل ولا فى حياتى الشخصيه
_ لا طبعا جايين نتكلم فى الشغل بس زى ما تقول كده بنتعرف الاول علشان التعامل يبقى سهل
= خلينا نبدأ فى الشغل على طول وخلى التعارف لوقت تانى
_ تعجبنى دماغك خلاص يا سيدى خلينا فى الشغل ، احنا عرفنا بخصوص الشغل اللى عاوز تعمله فى الماس واحنا مستعدين نساعدك تدخل سوق الماس بقوه وهنخليك تمضى عقود انت ماتحلمش بيها
= والمقابل
_ هنشترى 10% من اسهم شركة البترول بتاعتكم
= بس كده ماشى ياستى وانا موافق
_ لسه فى حاجات تانى
= اسمع باقى طلباتك
_ احنا عرفنا انك بتأسس شركه حديده مع سعيد الصفوانى احنا عاوزين نشترى 10% من الاسهم
= ومش عاوزين كمان تشتروا اسهم من شركات الصفوانى
_ ايه
= ايه متفاجأه من السؤال ولا من انا عرفت غرضكم ايه من الاول
_ عرفت ايه بالظبط
= انا عن نفسى موافق ادخلكم شريك فى الشركه الجديده بس طبعا بعد موافقة سعيد الصفوانى الاول

نظرت له سيرينا ولم ترد فنظر جابر بعدها لليندا وقال

= بعد اذنك يا ليندا روحى هاتى الضيف
_ حاضر

قامت ليندا وخرجت من غرفة الاجتماعات فسأل ديفيد جابر

_ مين الضيف ده
= الصبر وهتعرف كل حاجه

بعد دقيقتين دخلت ليندا ومعها سعيد ، نظر إليهم ديفيد وسيرينا فقال ديفيد

= سعيد الصفوانى
= كده كل الاطراف موجوده ونقدر نتناقش

فردت عليه سيرينا

_ بس احنا مطلبناش نشترى اسهم فى شركة الصفوانى
= انا حبيت بس اوفر الوقت والمجهود اللى هتاخدوه علشان تفكروا فى طريقه تطلبوا بيها الطلب ده او بمعنى اصح استر يعقوب تطلب الطلب ده ، ههههه اكتر حاجه عاجبانى فى استر انها عنيده ومش بتزهق
_ وايه علاقة استر بالشغل اللى بينا
= عيبكم انكم فاكرين العرب اغبياء ومش بيعرفوا يلعبوا ، انا عارف علاقتكم بأستر يعقوب كويس وعارف انكم شركاء ، انا كشفت ورقى قصادكم خلينا بقى نلعب على المكشوف ، شوفتى بقى يا سيرينا انا ساهل فى التعامل ازاى
_ انا دلوقتى بس اتاكدت انك عقليه جباره واللعب معاك مش حاجه بسيطه
= بالعكس بقى هو فى وضوح اكتر من كده ، طب انا هبسطهالك اكتر من كده انا موافق على الاسهم اللى انتوا طلبتوها فى شركة البترول والشركه الجديده وعاوزك تبلغى استر ان انا وسعبد موافقين موافقين على بيع 5% من اسهم شركات الصفوانى
_ والمقابل
= المقابل ده هحدده لما اقابل استر يعقوب شخصيا وقتها هتفق معاها على المقابل
_ انا هبلغها بالعرض بتاعك وهرد عليك فى اقرب وقت
= براحتك ، انا على العموم مسافر مصر فى خلال يومين بالكتير عاوز اقابلها فى اسرع وقت ممكن
_ عاوزها تسافرلك مصر علشان تقابلك
= هى مش مضطره تسافر انا عارف ان استر يعقوب فى مصر وانا هوفر عليها واقابلها فى مصر
_ مين اللى قالك اصلا ان استر فى مصر
= قولتلك خلينا نلعب على المكشوف وبلاش لف ودوران ، انا عارف ان استر فى مصر بلغيها رسالتى وحددى معاها معاد الاجتماع
_ حاضر هبلغها ، نستأذن احنا
= اتفضلوا

مشيت سيرينا وديفيد

نظر بعدها عمر الألفى لجابر وقال

_ انت هتجننهم كده يا جابر
= متخافش انا حاسب خطواتى كويس جدا

فرد عليه سعيد

_ بس انا شايف انك اتسرعت فى كشف الورق
= ده ورق محروق اصلا ، وعلشان كمان اضرب اى خطه هما مرتبينها

فقالت ليندا

_ بس انا خايفه عليك يا حبيبى ، استر يعقوب شخصيه مش ساهله علشان تعجل بمواجهتها بالشكل ده
= متخافيش يا حبيبتى كل حاجه مدروسه بالمللى

فاتبع سعيد قائلا

_ احنا كده لازم نرجع القاهره فى اسرع وقت ممكن
= هنرجع كلنا علشان الاجتماع ، انا واثق ان استر هتطلب تقابلنا فى اسرع وقت
_ عندك حق
= يلا بينا نمشى دلوقتى ونتقابل بالليل علشان نرتب للسفر
_ يلا بينا


هم الجميع وقاموا لكى يذهبون ، وفى اثناء تحركهم وقعت ليندا على الأرض بسبب دوارا ما
جرى عليها الجميع وكان اولهم جابر

_ مالك يا ليندا فى ايه
= مش عارفه ، فجأه حسيت انى دايخه ومش قادره اوقف
_ انا هكلم الدكتور
= مفيش داعى يا حبيبى هو بس شوية ارهاق من السهر
_ لا يا حبيبتى لازم نطمن عليكى
= مفيش حاجه يا ادم بجد

رد عليهم عمر الألفى

_ انا خلاص كلمت الدكتور ، ربع ساعه ويوصل

فأتبع سعيد قائلا

_ ممكن يكون عندها هبوط ولا حاجه ، قول للسكرتيره تجيب اى عصير
= حاضر

فسألها جابر
_ مالك يا حبيبتى هتقلقينى عليكى ليه
= صدقنى يا حبيبى مفيش حاجه ، ممكن يكون قلة نوم او توتر مش اكتر من كده
_ الدكتور بوصل دلوقتى ويطمنا عليكى ، ارتاحى بس انتى
= حاضر يا حبيبى

حملها جابر لكى يضعها على الأريكة وبعد ربع ساعه وصل الدكتور وكشف على ليندا

_ خير يا دكتور طمنى
= كل خير يا فندم مفيش داعى للقلق
_ هى كانت كويسه بس فجأه كده داخت ووقعت
= ده شئ طبيعى ، هو الحمل كده فى اوله متعب
_ حضرتك بتقول حمل
= الكشف المبدأى بيقول انها حامل فى شهر تقريبا بس محتاجين نعمل شوية تحاليل علشان نتأكد ، الف مبروك مقدما
_ يبارك فيك يا دكتور

فرد عليه عمر الألفى

_ احنا نطلع دلوقتى على المستشفى نعمل التحاليل المطلوبه علشان نتطمن
= طب انا هسبقكم على المستشفى دلوقتى
_ اتفضل يا دكتور

مشى الدكتور وخرج سعيد وعمر لكى يتركون جابر وليندا وحدهم

_ الف مبروك يا حبيبتى
= هو الكلام اللى قاله الدكتور ده بجد
_ ايوه يا حبيبتى بجد انتى مش مصدقه ولا ايه
= مستحيل يكون الكلام ده صح
_ ليه بتقولى كده ، يعنى علشان عامله حسابك وبتاخدى موانع حمل
= لا مش ده قصدى
_ امال قصدك ايه مش فاهم
= يلا بينا المستشفى دلوقتى نعمل التحاليل وبعد كده هقولك على كل حاجه
_ تقوليلى على ايه
= نعمل التحاليل الاول وبعد كده احكيلك على كل حاجه
_ حاضر ، يلا بينا


تحرك الجميع على المستشفى وقامت ليندا بعمل التحاليل من ثم انتظروا قليلا حتى خرجت نتيجة التحاليل، وتأكدوا بالفعل من انه حمل فى الشهر الأول بعدها تحرك الجميع من المستشفى فذهب سعيد ال إلى الفندق الذى يجلس به بينما ذهب عمر وجابر وليندا إلى الفيلا وبعدما دخلوا صعد جابر بصحبة ليندا إلى غرفتها وجلسوا ليتحدثون مع بعضهم كانت ليندا غير مصدقة لما حدث

_ ازاى ده حصل مش فاهمه
= ممكن تفهمينى ايه فى بالظبط
_ ازاى يعنى ابقى حامل وانا مش بخلف اصلا
= مش بتخلفى ازاى يعنى
_ هو ده السر اللى كنت مخبياه عليك طول السنين اللى فاتت
= واحده واحده وفهمينى ايه حكاية السر ده
_ بعد جوازنا بكام شهر لاحظت ان مفيش اى حمل حصل بالرغم انى مش باخد اى موانع للحمل وقتها قلقت وروحت اكشف واتطمن بس للأسف الدكتور بلغنى ان عندى مشاكل فى الرحم ومش هقدر اخلف والامل فى علاجى ضعيف جدا ميتعداش ال 10% ، وقتها انت كلمتنى فى موضوع الخلفه وانا رفضت بس من جوايا كنت بتقطع
= طب ليه مقولتليش الموضوع ده قبل كده
_ كنت خايفه تسيبنى
= يعنى حبوب مانع الحمل اللى كنتى بتاخديها دى كمان تمثيليه
_ مكنتش عاوزاك تشيل الهم ده معايا وكنت باخد العلاج بتاع الدكتور بانتظام ، بس كنت كل شويه اعمل تحاليل وللأسف كان التحسن ضعيف جدا
= علشان كده انتى اصريتى انى اتجوز ريهام
_ لا موضوع ريهام ده حاجه تانيه خالص ، ده غير ان انت من حقك تبقى اب
= انا كنت عاوز ابقى اب عن طريقك انتى مش حد تانى ، كان لازم تصارحينى من الاول بالموضوع ده
_ سامحنى يا حبيبى بس الموضوع ده صعب على اى واحده مهما كانت قويه
= احنا مش اتفقنا من اول يوم اننا نفضل فى ضهر بعض
_ سامحنى يا حبيبى
= هسامحك المره دى وبس علشان مقدر كمية الوجع اللى جواكى كانت وكمان علشان المشكله اتحلت لكن اوعدينى انك ماتخبيش عليا اى حاجه تانى مهما كانت
_ اوعدك يا حبيبى
= الف مبروك يا حبيبتى
_ الله يبارك فيك يا حبيبى

فجأة دخل عليهم عمر الالفى بومارى بعدما ابلغها بما حدث فدخلت وبعدها احتضنت ليندا وقالت

_ الف مبروك يا حبيبتى ربنا يتمملك بخير
= الله يبارك فيكى يا ماما

فرد عليها عمر الألفى

_ انا من ساعة ما عرفت بالخبر وانا مش عارف اسيطر على اعصابى

فقال جابر

= ليه كده
_ مبسوط انى خلاص هبقى جد وفى نفس الوقت خايف من المسئوليه الجديده
= وانت قدها
_ انتوا عاوزين ولد ولا بنت

فقالت ليندا

= انا عاوزه ولد
_ اشمعنا
= علشان يكون شبهك يا حبيبى ويبقى معايا نسخه تانيه منك
_ ايه الكلام الجامد ده على طول بتغلبينى بكلامك
= وانت نفسك فى ولد ولا بنت
_ ولد او بنت اى حاجه هتبقى حلوه طالما منك انتى
= وتقول عليا انا اللى كلامى حلو

فرد عمر الألفى

_ ربنا يسعدكم ببعض
= اهم حاجه فى الفتره اللى جايه ترتاحى على الاخر وتنسى موضوع الشغل ده نهائى
_ ازاى بس يا حبيبى ده احنا مضغوطين جدا فى الشغل
= انا قولت مفيش شغل يبقى مفيش شغل
_ امرك يا حبيبى

رد عليها عمر الالفى

= اموت واعرف الزفت ده عاملك ايه بالظبط اكيد ساحرلك انتى خلاص مش بتقدرى تناقشيه
_ مش جوزى حبيبى ولازم اسمع كلامه
= وانا ابوكى يا بنت اللذينة وعمرك ما سمعتى كلامى
_ بس تنكر برضه انى بحبك
= انتى كده محدش يعرف ياخد معاكى حق ولا باطل بتعرفى تلفى دماغى فى ثانيه

فقال جابر

_ خلينا فى المهم انا عاوزك ترتاحى علشان احنا لازم نرجع مصر فى خلال يومين

فردت مارى

=ايه الكلام اللى انت بتقوله ده يا جابر ، انت عاوز بنتى تبعد عنى وهى حامل
_ متخافيش عليها هى معايا وانا هاخد بالى منها وهجيبلها اللى يخدمها بس احنا لازم ننزل مصر علشان الشغل المتاخر هناك

فسألته ليندا

= بس مش ممكن يكون فى خطر على الحمل من السفر الطويل
_ لا يا حبيبتى انا سألت الدكتور فى الموضوع ده وقال مفيش اى مشكله تقدرى تسافرى عادى ، وعلى فكره انا مش بجبرك انك تسافرى مصر انتى لو عاوزه تقضى شهور حملك هنا عادى جدا انا اسافر مصر واجيلك كل شويه
= لا يا ادم انا مسافره معاك
_ لو عاوزه تقعدى هنا انا مش هزعل
= انا قولتلك مسافره معاك وخلاص كده
_ خلاص براحتك متتعصبيش ، جهزى نفسك واحنا هنسافر بكره او بعده بالكتير
= انا جاهزه
_ تمام كده