الفصل التاسع عشر

كانت تجلس ريهام الحارونى وتجلس معها ايضا سارة العاصى يتحدثون ، لاحظت سارة أن القلق والتوتر يملئ وجه ريهام فسألتها
_ مالك يا ريهام قاعده بتكلمى نفسك كدا
= قلقانه على جابر من وقت ما سافر كلمنى مره واحده بعد كده تليفونه اتقفل
_ اكيد معاه شغل ومش واخد باله من التليفون وبعدين هو يادوب سافر من يومين وانتى عارفه فرق التوقيت بين مصر وامريكا
= ممكن بس برضه قلقانه
_ خير يا بنتى متقلقيش

نظرت إليها ريهام وكأنها تزكرت شيئا

_ هو انتى مش المفروض تسافرى القاهره علشان الجامعه هتبدأ اول الاسبوع اللى جاى
= ايوه كان المفروض اسافر النهارده بس بابا قالى خلينى يومين واسافر معاه علشان هو كمان معاه شغل فى القاهره
_ طب تمام ، على العموم انا كلها شويه واحصلك بس لما جابر يرجع بالسلامه
= دى احلى حاجه انك هتعيشى فى القاهره وانا ابقى قريبه عليكى
_ انتى بتكلمى سعيد
= من بعد فرحك معرفش عنه حاجه
_ ليه كده
= مش عارفه
_ يبقى انتى كده مش بتحبيه او على الاقل مش هو اللى انتى عاوزه تتجوزيه
= بينى وبينك انا مابقتش عارفه حاجه ، كل اللى عارفاه انى عاوزه اخلص الجامعه بتاعتى وبعدها يحلها حلال
_ عندك حق ، ركزى فى دراستك وبعد كده كل حاجه ملحوقه
فجأة دخلت عليهم الخادمة فسألتها ريهام قائلة
_ خير فى حاجه
= احمد باشا عاوز حضرتك تحت
_ حاضر انا نازله حالا

قالت لها سارة

_ شكلها كده فى مشكل
= ربنا يستر ، تعالى نشوف ايه فى
_ يلا بينا


نزلت ريهام وسارة لكى تعرف ريهام ماذا يريد اخيها

_ خير يا احمد فى ايه
= لا مفيش حاجه بس بتطمن عليكى
_ انا كويسه الحمدلله
= بتكلمى جابر
_ ايوه بكلمه عادى
= بجد ، طب هو فين
_ فين ايه يا احمد جابر فى امريكا انت ناسى ولا ايه
= انتى اخر مره كلمتيه كان امتى
_ امبارح الصبح بعد ما وصل امريكا
= يعنى ماتكلمتوش تانى
_ لا خالص حتى انا بكلمه من الصبح بس تليفونه مقفول ، ليه هو جابر حصله حاجه
= لا محصلش حاجه بس انا بحاول اوصله لانى عاوزه فى شغل بس تليفونه مقفول
_ طب ما تكلم والد ليندا اكيد هيوصلك بيه
= عملت كده بس هو قالى ان جابر سافر تانى
_ ايوه فعلا جابر كان قايل انه هيسافر ايطاليا بس غريبه يسافر ايطاليا بالسرعه دى

فردت عليهم سارة

_ طالما كان مقرر يسافر ايطاليا بالسرعه دى ايه اللى خلاه يسافر امريكا من الاساس
= امتى قال انه هيسافر ايطاليا يا ريهام
_ قبل ما نرجع من شهر العسل لما قالى انه مسافر امريكا طلبت منه انى اسافر معاه بس هو قالى خليها مره تانى علشان هو هيسافر على ايطاليا من هناك
= وبعدين معاك يا جابر
_ انت قلقتنى كده يا احمد
= يا ستى متقلقيش مفيش حاجه كل الحكايه انى محتاجه فى شغل مش اكتر
_ كلامك ده يقلقنى اكتر لان انتوا الاتنين شغلكم غامض وشوفنا بسببه مصايب كتير
= لا يا ستى مش شغل غامض ولا حاجه ده بخصوص الشركه الجديده اللى بيفتحها جابر فى مصر فى ورق مهم ناقص والمحامى كلمنى من شويه
_ على العموم انا هحاول تانى معاه ولو وصلت لحاجه هبلغك
= تمام حاولى انتى وانا كمان هحاول واللى يوصل فينا لحاجه يبلغ التانى
_ حاضر يا احمد
= طب اسيبكم مع بعض واروح اشوف شغلى

صعدت سارة وريهام مرة أخرى إلى الغرفة وبعدما جلسوا قالت سارة

_ مش عارفه ليه حاسه ان فى حاجه مش مظبوطه
= وانا كمان زيك ، كلام احمد مش راكب على بعضه وحاسه ان فى مصيبه
_ طب حاولى تتصلى تانى بجابر يمكن يكون فتح تليفونه
= حاضر يا ستى هحاول تانى

اخرجت ريهام هاتفها وقامت بالأتصال بجابر مرة اخرى ولكن دون جدوى

_ لسه قافل تليفونه
= انا عندى اقتراح بس خايفه تزعلى
_ اقتراح ايه ده
= ليندا ممكن تكون عارفه حاجه عن جابر انتى ممكن تتصلى بيها
_ عندك حق انا هكلمها بس المشكله انى مش مسجله رقمها عندى
= معقول مش معاكى رقمها
_ هى ادتنى كارت فيه كل ارقامها بس مش فاكره انا حطيته فين
= شوفيه فى اى شنطه من شنطك ولا فى اى درج
_ استنى احاول افتكر انا حطيت الكارت فين
= ركزى وحاولى تفتكرى
_ انا اخدت الكارت منها تانى يوم موضوع الخطف يومها كان معايا الشنطه البيضاء
= فين الشنطه دى
_ اه فى الدريسنج روم
= طب روحى هاتيها

ذهبت ريهام واحضرت الشنطة والبفعل كان الكارت متواجدا بها

_ لقيت الكارت
= طب كلميها بسرعه
_ حاضر

أخرجت ريهام هاتفها وبدأت بالأتصال بكل الأرقام المتواجدة على الكارت وبككن لم تجد رقما منهم متاح

_ كل ارقامها مقفوله برضه
= حتى ليندا قافله تلفونها
_ ده معناه حاجه واحده وهى ان الاتنين مع بعض
= او جايز يكون فى مصيبه والاتنين متورطين فيها مع بعض
_ مصيبة ايه يعنى
= لأن مش منطقى الاتنين تليفوناتهم مقفوله فى نفس الوقت ، ده غير ان واضح ان اخوكى قالب الدنيا على جابر وبيحاول يتطمن منك بطريقه غير مباشره علشان انتى متقلقيش
_ هى وجهة نظر برضه بس انا كده قلقت اكتر
= طب والحل ايه دلوقتى
_ انا عندى فكره ممكن عن طريقها نعرف ايه اللى بيحصل
= فكرة ايه دى
_ ايه رائيك تتصلى بسعيد الصفوانى وتسأليه على جابر
= اشمعنا سعيد
_ انتى ناسيه ان سعيد يبقى شريك جابر وحتى الشركه الجديده اللى جابر بيفتحها سعيد شريك فيها
= تصدقى نسيت خالص الموضوع ده
_ طب كلميه عادى كأنك بتطمنى عليه وحاولى تجيبى سيرة جابر يمكن نطلع بمعلومه
= ماشى يا ستى هكلمه


اخرجت سارة هاتفهما واتصلت بسعيد ورد عليها فقالت

_ ازيك يا سعيد اخبارك ايه
= الحمد لله بخير ، انتى اخبارك ايه واخبار سيف وسيادة المستشار
_ كلنا بخير ، طمنى عليك وعلى بنات عمك
= كلنا كويسين ، انتى فى البلد ولا رجعتى القاهره
_ لا لسه فى البلد بس راجعه المقطم بعد يومين
= تيجى بالسلامه
_ انا لقيتك غطست كده من بعد ما سافرت قولت اتصل اتطمن عليك
= انا كويس يا ستى بس مضغوط شويه فى الشغل الفتره دى معلش
_ يا عم انت هتعيش طول عمرك ضاغط نفسك فى الشغل شوف حياتك
= اعمل ايه بس ما انا لوحدى فى الشغل وكل الضغط على دماغى ده انا بطلع من الصبح بدرى مش برجع قبل بالليل متأخر
_ ليه يا عم كده مش المفروض جابر شريكك ما تسيبه يمسك معاك ويريحك
= لما يرجع من السفر هنظبط مع بعض بقى ونقسم الشغل
_ هو هيرجع امتى من السفر امال
= لسه مش عارف بس اكيد قريب
_ يرجع بالسلامه مع انى خايفه عليه من المشاكل اللى هنا
= مشاكل ايه تانى
_ انت عارف بقى المشاكل الى بتحصل فى كل مره جابر بيكون فيها فى البلد
= عندك حق والله ، بس هو اعمامك لسه كارهين جابر ولا ايه
_ حاليا محدش بيجيب سيرة جابر بس انت عارف ان نفوسهم مش صافيه
= وبعدين معاهم مش ناويين يعقلوا حتى بعد ما جابر سابلهم كل حاجه لسه برضه كارهينه
_ صدقنى لو قولتلك ان انا خلاص تعبت منهم ومن مشاكلهم
= ربنا يعديها على خير
_ هو جابر ماتكلمش معاك فى حاجه بخصوص العيله
=. لا خالص جابر مش بيحب يتكلم اصلا فى الموضوع ده من زمان
_ نفس الحكايه حصلت مع ريهام لما فتحت معاه الموضوع ده
= حصل ايه
_ قفل معاها الكلام وقلب وشه حتى ريهام وقتها خافت منه
= معلش مسير الايام تصلح كل حاجه
_ انت اخر مره قابلت فيها دياب امتى
= اخر مره كانت يوم الفرح حتى لما سافر ملحقتش اشوفه لانه سافر من مطار الاقصر
_ هو كمان فجأه قطع شهر العسل بتاعه وسافر حتى احنا استغربنا
= معلش بقى فى شغل مهم لازم يخلصه بنفسه
_ انت اخر مره كلمت فيها جابر امتى
= قبل ما يسافر على طول ، ليه فى حاجه
_ لا سؤال عادى بتطمن بس
= معلش يا هايدى مضطر اقفل لان معايا اجتماع مهم دلوقتى هخلص واكلمك تانى
_ اتفضل يا سعيد معلش عطلتك
= لا متقوليش كده انتى تتصلى فى اى وقت