الفصل الثامن عشر

كانت تجلس فاتن زوجة أحمد الحارونى بغرفتها ودخلت عليها زوجته الثانية امانى فمنذ ما حدث وهى غاضبة حتى الأن ولا تجلس معهم ولا تتحدث مع أيا منهم بالمنزل ، نظرت إليها فاتن بعدما دخلت عليها وقالت

_ خير يا امانى فى حاجه
= هتفضلى كده لحد امتى يا فاتن
_ وانتوا عاوزين منى ايه
= عاوزينك معانا ، البيت ده كله من غيرك ملهوش طعم
_ مش فارقه كتير ، يعنى انا بعمل ايه
= بتعملى كتير يا فاتن ، على طول ماليه البيت فرح وهزار وحيويه ، البيت ده عباره عن فاتن ، لو فاتن مش موجوده البيت بيتحول لقبر
_ ده لما كنت حاسه ان البيت ده بيتى وكل اللى فيه بيحبونى
= البيت ده هيفضل طول عمره بيتك وكلنا بنحبك ومنقدرش نستغنى عنك مش علشان كلمه قالتها حماتى من غير قصد تخليكى تقفلى على نفسك كده ، اعذريها برضه اللى حصل معاها مش قليل ، ابوها راح واخوها الوحيد زى ما انتى شايفه واللى زاد وغطى جوازة ريهام وجابر
_ وهو ابوها راح ليه مش علشان كان عاوز يقتل ابنى ، واخوها ده اللى خطف بنتها وسبحان الله الوحيد اللى قدر ينقذها هو جابر اللى هى بتكرهه ، انقذ بنتها زى ما قبلها انقذ ابنى بدل المره عشره جابر ، اللى بيقولوا عليه ابن الخدامه هو اللى ربى ابنى احسن تربيه وصرف عليه واداله عمره ، جابر اللى قطع حته من لحمه علشان ابنى يعيش جابر انقذ ابنى فى الوقت اللى ابوها كان بيرتب لقتله ، جابر انقذ ريهام من اخوها اللى كان خاطفها ، حماتك المفروض كل يوم تبوس ايد جابر على كل اللى عمله
= خلاص يا فاتن علشان خاطرى انا ماتزعليش نفسك ده انا مليش فى البيت ده غيرك انتى صاحبتى الوحيده هنا واختى اللى ربنا عوضنى بيها
_ صدقينى انا مش زعلانه بس صعبانه عليا نفسى ، امى قبل ما تموت قالتلى طول ما حماتك عايشه هبقى متطمنه عليكى ، فينك يا امى تشوفى حماتى ، انا بقالى فتره كبيره شايفه انها بتتجنب الكلام معايا بس بقول جايز ان انا غلطانه او يمكن متضايقه على اخوها لكن يطلع ده كله علشان الحيوان ابوها
= لو جينا للحق يا فاتن من حقها تزعل على ابوها حتى لو كان شيطان
_ خلاص يا امانى مش قادره اتكلم تانى فى الموضوع ده
= طب علشان خاطرى انزلى معايا
_ شويه كده وهنزل بس محتاجه اقعد مع نفسى شويه
= لا يا فاتن مش هسيبك وهقعد معاكى لحد ما ننزل مع بعض رجلى على رجلك
_ ماتبقيش رخمه
= قولى زى ما انتى عاوزه ، ايوه انا رخمه ورزله وبارده بس برضه مش هسيبك
_ ههههههههه يخربيتك ضحكتينى وانا مليش نفس
= ايوه كده اضحكى خلى الدنيا تضحك ، وبعدين محدش واخد منها حاجه
_ انتى طيبه اووووى يا امانى
= انتى يا فاتن اللى مفيش اطيب منك ، هقولك على سر اول مره اقولهولك
_ سر ايه ده
= فى الاول خالص اول ما عرفتك لما كنتى لسه مخطوبه لأحمد كنت بكرهك جدا ومش طايقه اشوفك قصادى ولا طايقه اسمع اسمك
_ هههههه عارفه ، كنت على طول بشوف فى عينك نظرة غضب لما كنت بزور احمد فى القاهره
= وانتى كنتى مزوداها مع احمد وعلى طول بتدلعى عليه وحاسه انك بتطليعيلى لسانك وتغيظينى ساعتها كان هاين عليا اطبق فى رقبتك واخنقك
_ ههههههههه كل ده جواكى
= بس فجأه اتحول كل الكره ده لحب ، يوم ما رأفتى بحالى وطلبتى من احمد يتجوزنى
_ طب كنتى هتعملى ايه لو كنت طلبت من احمد يتجوز واحده تانى غيرك انتى
= ساعتها كنت هخنقك بأيدى
_ قلبك ابيض ، طب كويس ان انا سمعت بنصيحة اسماء لما قالتلى انك بتحبى احمد
= اسماء كانت صاحبتى الوحيده ف الجامعه وسرى كله كان معاها وهى اللى كانت بتصبرنى
_ صحيح هى اخبارها ايه
= هى كويسه وزى الفل ياستى لسه مكلمانى من كام يوم
_ مش ناويه ترجع مصر
= وترجع مصر ليه ، حد يسيب اسبانيا ويرجع مصر
_ يعنى هتعيش طول عمرها فى الغربه
= انا عرفت ان هى وابراهيم اخدوا الجنسيه ومستقرين هناك وشركة البرمجه اللى فتحها ابراهيم كبرت هناك وشكلهم كده مش راجعين تانى خصوصا بعد موت ابوها وامها
_ انا زعلت لما عرفت ان احمد وابراهيم فضوا الشركه اللى بينهم لانى كنت فاكره ان فى مشاكل
= لا مفيش مشاكل بس ابراهيم كان حابب يعمل شركه لوحده واتفق مع احمد على كده
_ على العموم ربنا يوفقه فى اختياره
= طب يلا بينا ننزل تحت فى الجنينه الجو هناك حلو
_ اسبقينى انتى هاخد شاور واغير هدومى واحصلك
= حاضر

على الجانب الأخر فى الساعة التاسعة مساءا كان يجلس سعيد بمكتبه بعدما ذهب أغلب الموظفين والمديرين وايضا ذهبت هبة والمتر شريف لم يبقى إلا السكرتيرة الخاصة به ، جلس سعيد قليلا ثم دخلت عليه السكرتيرة

_ خير فى حاجه
= البشمهندس يوسف ومعاه الاستاذ معتز موجودين بره
_ خليهم يدخلوا بسرعه ومش عاوز اى ازعاج او اى حد يدخل علينا مفهوم
= حاضر يا فندم

دخل يوسف ومعتز وبعدها اغلقت السكرتيرة عليهم بعدما امرها سعيد ام تذهب إلى بيتها فقد انتهى عملها اليوم
ثم عاد مرة أخرى إليهم

_ ايه اخباركم يا شباب
رد عليه معتز قائلا
= ممكن اعرف انت جايبنا فى الوقت المتأخر كده ليه
_ عاوزكم فى شغل اكيد مش جايبكم علشان نلعب
فرد عليه يوسف
= يا اخى حرام عليك احنا طول اليوم طالع عنينا والواحد ما بيصدق يرجع البيت يرتاح
_ معلش يا يوسف بس فى شعل مهم ومش هقدر اثق فى اى حد غيركم
= خير يا سعيد انت كده هتقلقنا
_ خير كتير جدا بس فتحوا دماغكم معايا ومش عاوز اى كلمه من اللى هتتقال دلوقتى تطلع بره
= قول يا كبير واحنا مركزين
_ الحكومه النهارده اعلنت عن مناقصه كبيره بخصوص المدن الجديده اللى عاوزه تبنيها
= ايوه انا عندى فكره بالموضوع ده بس دى مناقصات ضخمه جدا
_ ايه يا يوسف هو احنا صغيرين
= لا مش قصدى يا سعيد بس انتوا مركزين اكتر فى المجال الصحى مابين مصنع الادويه والمستشفيات لكن شركة المقاولات وشركة الاستيراد والتصدير عاملينها صغيره ويادوب بندخل مناقصات صغيره
_ وجيه الوقت اللى نكبر الشركه وندخل مناقصات كبيره ونعمل اسم كبير فى عالم المقاولات زى ما عملنا اسم كبير فى مجال الادويه
فرد عليه معتز قائلا
= الكلام اللى انت بتقوله ده جميل بس فى عقبه انت مش واخد بالك منها وعقبه مش ساهله كمان
_ عقبة ايه دى
رد يوسف موضحا الأمر
= معتز قصده ان فى حيتان فى البلد ومش بالساهل يسيبوا مناقصات زى دى
فاتبع معتز
= هو ده قصدى فعلا يا يوسف ، ياسعيد اعذرنى فى اللى هقوله احنا فى الاول والاخر اصحاب وانا علشان بحبك هكون صريح معاك
_ عاوز تقول ايه يا معتز
= انت اه ذكى وشاطر فى شغلك وتقدر تقوم بعشر مناقصات مش مناقصه واحده بس عيبك انك ابيض وعايش فى عالم مثالى بعيد عن العالم بتاعنا ، العالم بتاعنا اللى بتحكمه قوانين الغابه
_ فاهم قصدك يا معتز وانا هدخل وسط الحيتان دى مهما كلفنى الامر
= بس اكيد مناقصه زى دى هيدخل فيها احمد الحارونى
_ من حقه يدخل زى ما كمان من حقى انا ادخلها ده سوق ومفتوح والشاطر اللى يعرف يكسب
= بس انت كده ممكن تخسر احمد الحارونى فيها
_ ايه يا عم الكلام الكبير ده دى مناقصه عاديه زيها زى اى مناقصه فى السوق ومن حق اى حد يدخلها
= ايوه انا عارف الكلام ده بس انتوا مهما كان اصحاب ولازم تظبطوا الشغل مع بعضكم
_ مين قال ان انا واحمد الحارونى اصحاب انا واحمد عمرنا ما كنا اصحاب احنا يا دوب معارف او بلديات مش اكتر من كده وبعدين العلاقات الشخصيه حاجه والشغل حاجه تانيه
= براحتك يا سعيد زى ما تحب ، قولنا دلوقتى ايه المطلوب علشان نبدأ نشتغل
_ كل المطلوب منكم ان انتوا تسحبوا كراسة الشروط وتشتغلوا عليها بس كل ده فى سريه تامه
= حاضر يا سعيد

جلسوا يتحدثون فيما يقارب الساعتين بعدها ذهب كلا منهم إلى بيته لكى يتسريح
فى اليوم التالى كان سعيد جالسا بمكتبه يتابع بعض الأعمال حتى دخل عليه فجأة المتر شريف

_ خير يا متر فى ايه شكلك بيقول ان فى مصيبه
= فى مصيبه كبيره
_ مصيبة ايه دى يا متر وقعت قلبى
= جابر وليندا اتخطفوا
_ مين اللى خطفهم وازاى
= جابر وليندا كانوا مسافرين تايلاند امبارح ، مجرد ما وصلوا المطار اختفوا هناك والحراسه اللى كانت معاهم مش عارفين يوصلولوهم
_ يعنى اتخطفوا من وسط الحراسه
= حاجه زى كده وعمر الالفى قالب الدنيا وخايف على بنته
_ مين ده اللى يخطف جابر من وسط رجالته
= اللى حاول يقتله يوم الفرح
_ يعنى هما سابوه طول المده اللى كان فيها فى مصر وراحوا يخطفوه فى تايلاند
= مش عارف بقى
_ على العموم كل حاجه هتبان ، بس اهم حاجه دلوقتى نوقف اى شغل
= انا عملت كده فعلا
_ يبقى دلوقتى نصبر ونشوف الايام اللى جايه مخبيه ايه
= ربنا يستر

من ناحية أخرى فى امريكا كان يجلس عمر الألفى بالفيلا الخاصة به ومعه مارى زوجته ، كانت مارى تحس انه مشغولا بشيئا ما فى باله فسألته

_ مالك يا عمر شكلك متغير زى ما يكون فى مشكله
= لا يا حبيبتى دى مشاكل الشغل العاديه
_ انت اللى غاوى تعب ، قولتلك كتير ريح نفسك وسيب الشغل لجابر وليندا
= انا مش هسيب شغلى غير لما اموت
_ بعد الشر عليك يا حبيبى ماتقولش الكلام ده تانى
= انتى اكيد شوفتى جابر قبل ما ياخد ليندا ويسافر
_ ايوه طبعا وقعد معايا ورغينا شويه
= مقالش هياخد ليندا ويسافروا فين
_ قال انه مسافر تايلاند ، هو مش قالك
= لا قالى بس بتصل بيه من وقتها وتليفونه مقفول
_ هو قال انه هيقفل كل تليفوناته علشان يستمتع مع ليندا بالاجازه بعيد عن الشغل وقرفه لانه مش عاوز ازعاج
= جابر مش هيجيبها لبر خالص
_ ليه بتقول كده
= انا محتاجه ضرورى فى شغل ومش عارف اوصله
_ على العموم كلها يومين ويرجع هو قال انه مش هيتأخر
= ياريت
_ مالك يا عمر شكلك مخبى عليا حاجه
= وانا هخبى عليكى ايه يعنى
_ مش عارفه بس احساسى بيقول كده
= بطلى هبل وشيلى الافكار الوحشه من دماغك ، كل الحكايه ان انا عاوز جابر فى شغل

فجأه دخلت عليهم الشغاله ونظرت لعمر وقالت

_ مستر كريم موجود بره بيقول ان حضرتك طلبته
= دخليه المكتب وانا جاى حالا
_ حاضر يا فندم عن اذنك
فردت عليه مارى بعدما ذهب الشغالة
_كريم مين ده ، مش كريم ده الحارس الشخصى بتاع جابر
= ايوه هو
_ وكريم بيعمل ايه هنا مش المفروض يسافر مع جابر
= لا يا ستى جابر رفض ياخد اى حراسه معاه من هنا وقال انه عاوز ياخد راحته من غير اى حراسه
_ هو جابر بيستهبل ولا ايه ازاى يمشى من غير حراسه
= انا خلاص تعبت مع جابر ولازم احط حل للمهزله دى
_ انا قلقانه على بنتى يا عمر
= قولتلك مفيش حاجه وسيبينى اروح للراجل يمكن اعرف منه حاجه بخصوص جابر

دخل عمر المكتب وكان كريم متواجداً بالداخل الذى حينما راه هم واقفا فذهب عمر وجلس امامه على المكتب واشار له بيده بالحلوس وقال

_ اقعد يا كريم وفهمنى اللى حصل بالظبط
= احنا وصلنا مطار تايلاند عادى جدا ومجرد مانزلنا من الطياره لقينا الشرطه مستيانا وطلبوا من مستر آدم وليندا انهم يروحوا معاهم ، فى الاول مستر آدم رفض يمشى معاهم لكن بعد ما اتكلم مع الظابط على جمب وافق يروح معاهم وبالفعل اتحركنا كلنا لحد ما دخلنا مكتب فى المطار بس الشرطه منعتنا من الدخول مع مستر آدم ، ومستر آدم بعدها امر ان احنا ننتظر من بره ، بالفعل قعدنا منتظرين اكتر من ساعه لحد ما قلقت وحسيت بالخطر اضطريت افتح باب المكتب لكن المفاجأه ان المكتب فاضى ومفيش اى حد موجود
_ فاضى ازاى يعنى ، ممكن يكون فى مخرج تانى للمكتب واكيد خرجوا منه
= للأسف مفيش اى مخرج تانى للمكتب
_ وبعدين عملت ايه
= روحت لأمن المطار وبلغتهم باللى حصل لكن اكتشفت ان مفيش اى شرطه كانت فى انتظار مستر آدم واكيد الناس اللى اخدوه مش شرطه
_ اكيد المنطقه اللى اتاخدوا منها فيها كاميرات
= للأسف يا فندم الجزء ده من المطار اكتشفوا ان فى حد دخل على السيستم وعطل كل الكاميرات الموجوده هناك
_ انت عارف معنى كلامك ده ايه ، يا افندى كده آدم وليندا اتخطفوا
= هو ده الاحتمال الوحيد وعلشان كده انا كلمت حضرتك بس حضرتك رفضت انى ابلغ السفاره ورفضت انى اعمل اى محضر وامرت ان انا ارجع مع طقم الحراسه
_ طب لما آدم كان ماشى مع الناس دى ايه كانت تعبيرات وشه
= كان طبيعى جدا
_ طب امشى انت دلوقتى ولو احتاجتلك هكلمك
= حاضر يا فندم

بعدما ذهب كريم جلس عمر مع نفسه يفكر

_ ياترى انت فين يا جابر ، ياخوفى لتكون بتعمل مصيبه جديده